Ռուսիոյ արտաքին գործոց նախարար Սերկէյ Լաւրով յայտարարեց, որ Միացեալ Նահանգներ Մոսկուայի կողմէ առաջարկուած անվտանգութեան երաշխիքներու նախաձեռնութեան իրենց պատասխանին մէջ չեն անդրադարձած ռուսական կարեւորագոյն պահանջին` ՕԹԱՆ-ի դէպի արեւելք ընդլայնումը դադրեցնելուն:
«Ուաշինկթընի` անվտանգութեան երաշխիքներուն վերաբերեալ պատասխանները լուրջ, սակայն երկրորդական հարցերու շուրջ երկխօսութեան սկսման նկատմամբ յոյս կը ներշնչեն», ըսաւ Լաւրով:
Նշենք, որ Միացեալ Նահանգներ 26 յունուարին անվտանգութեան երաշխիքներու նախաձեռնութեան իրենց գրաւոր պատասխանը յանձնեցին Ռուսիոյ:
Ռուսիոյ նախագահի բանբեր Տմիթրի Փեսքով իր կարգին լրագրողներուն յայտնեց, որ ամերիկեան պատասխանը նկատի չէ առած Ռուսիոյ տեսակէտը: «Կարելի չէ ըսել, որ մեր տեսակէտը նկատի առնուեցաւ կամ ամերիկեան կողմը պատրաստակամութիւն ցուցաբերեց մեր մտավախութիւնները հաշուի առնելու», ըսաւ Փեսքով` աւելցնելով. «Չաճապարենք գնահատականներ տալու, վերլուծումը ժամանակ կ՛առնէ»: