ԵՐԵՒԱՆ ԿԸ ՀԱԿԱԴԱՐՁԷ
ՈՒԱՇԻՆԿԹԸՆ, «Ազատութիւն».- «Չենք պաշտպաներ Հայաստանի եւ Ռուսիոյ միջեւ համագործակցութիւնը Սուրիոյ մէջ: Այս մասին Սուրիա հայ մասնագէտներու խումբ ուղարկելու վերաբերեալ «Այսօր»ի տուած հարցումին պատասխանելով՝ նշուած է Հայաստանի մէջ Միացեալ Նահանգներու դեսպանութեան տրամադրած պատասխանին մէջ:
«Մեզի հասկնալի է Սուրիոյ մարդասիրական իրավիճակին արձագանգելու այլ պետութիւններու փափաքը եւ մենք կը կիսենք Միջին Արեւելքի մէջ կրօնական փոքրամասնութիւններու պաշտպանութեան շուրջ մտահոգութիւնները», ըսուած է պատասխանին մէջ:
«Այնուհանդերձ, մենք չենք պաշտպաներ Սուրիոյ զինուած ուժերուն ներգրաւուածութիւնը՝ ըլլայ քաղաքացիական անձերու օգնութիւն ցուցաբերելու նպատակով, թէ ռազմական ուղղուածութեամբ: Մենք նաեւ չենք պաշտպաներ Հայաստանի եւ Ռուսիոյ միջեւ համագործակցութիւնը այս առաքելութեան նպատակով: Ռուսիա կը գործակցի (Սուրիոյ նախագահ Պաշշար) Ասատի վարչակարգին հետ՝ կոտորածի ենթարկելով քաղաքացիներ եւ պատճառ դառնալով մարդասիրական աղէտի: Ռուսիա կը շարունակէ համաշխարհային հարթակի վրայ հանդէս գալ Ասատի վարչակարգին եւ վերջինիս վայրագութիւնները պաշտպանողի դիրքերէն», ըսուած է պատասխանին մէջ:
Յիշեցնենք, որ 8 Փետրուարին Սուրիոյ ժողովուրդին մարդասիրական մասնագիտական օժանդակութիւն ցուցաբերելու նպատակով ականազերծողներէ, բժիշկներէ եւ անոնց անմիջական ապահովութիւնը երաշխաւորող հայ մասնագէտներէ բաղկացած խումբը ժամանած էր Սուրիոյ Հալէպ քաղաքը:
Հայաստանի պաշտպանութեան նախարար Դաւիթ Տօնոյեան նշեց, թէ, ըստ իրեն, հարց կայ ամերիկեան յայտարարութեան թարգմանութեան մէջ: Տօնոյեան նկատել տուաւ, որ իրենք Սուրիա գործուղած են զուտ մարդասիրական նպատակներով աշխատողներ եւ ոչ թէ զինուորականներ:
«Հաւանաբար, հարցումներ են եղել, իրենք էլ իրենց կարծիքը յայտնել են, որ չեն աջակցում մեր՝ Ռուսիոյ հետ համատեղ ծրագրին: Կարծում եմ՝ սրան արձագանգելու է արտաքին գործոց նախարարութիւնը», աւելցուց Տօնոյեան:
Պատասխանելով այն հարցումին, թէ ամերիկեան արձագանգը ի՛նչ հետեւանքներ կրնայ ունենալ՝ Տօնոյեան ըսաւ. «Տեսնում եմ, որ կայ որոշակի աշխարհաքաղաքական հակասութիւն, բայց մեր աջակցութիւնը Սիրիայի ժողովրդին, որի մաս է կազմում հայկական համայնքը, կարծում եմ՝ բարոյական առումով անխոցելի է, եւ որեւէ կերպ չի կարող շահարկման առիթ հանդիսանալ»: