Հայաստանի եւ Ազրպէյճանի միջեւ խաղաղութեան համաձայնագիրը Հարաւային Կովկասի մէջ խաղաղութեան բանալին է: «Անատոլու» լրատու գործակալութիւնը կը հաղորդէ, որ այս մասին յայտնած է Թուրքիոյ արտաքին գործոց նախարար Մեւլութ Չաւուշօղլու:
Ան ուշադրութեան հրաւիրած է Թուրքիոյ եւ Հայաստանի միջեւ յարաբերութիւններու կարգաւորման ուղղուած ջանքերուն: «Յատուկ ներկայացուցիչները չորս զրոյց ունեցած են: Խօսքը կապերու աստիճանական կարգաւորման մասին է: Ազրպէյճանի յաղթանակէն ետք Թուրքիան հանդէս եկաւ Հարաւային Կովկասի մէջ երկարաժամկէտ խաղաղութեան օգտին: Այս ուղղութեամբ քայլերը կը շարունակուին: Խօսքը Հայաստանի հետ օդային հաղորդակցութեան վերականգնման մասին է եւ այլն: Առեւտուրի ոլորտին մէջ որոշակի ջանքեր գործադրուած են», ըսած է թուրք նախարարը:
Ան միեւնոյն ժամանակ, ենթակայական կոչած է Անգարայի եւ Երեւանի երկխօսութիւնը Հայաստանի եւ Ազրպէյճանի միջեւ հաղորդակցութիւններէն մեկուսացուած ընկալելու փորձերը:
«Հարաւային Կովկասի մէջ երկարաժամկէտ խաղաղութեան բանալին Հայաստանի եւ Ազրպէյճանի միջեւ տարողունակ խաղաղութեան համաձայնագիրն է: Պաքուն յայտարարած է իր նախաձեռնութիւններուն մասին, որոնց Երեւանը չէ արձագանգած: Աշխատանքներուն սկսելու համար ստեղծուած է միացեալ յանձնախումբ: Խօսքը Զանգեզուրի միջանցքին մասին է: Սակայն ասիկա Հայաստանին կը մտահոգէ: Երեւանը պէտք է որոշէ` խաղաղութիւն կ՛ուզէ՞», աւելցուցած է Չաւուշօղլու:
Ան միեւնոյն ժամանակ ընդգծած է, որ երկու տարի ետք հայկական զօրքերը տակաւին չեն լքած «Ազրպէյճանի տարածքը»:
«Բոլորին ակնյայտ է կարգաւորման հոլովոյթին մէջ Հայաստանի ոչ անկեղծութիւնը: Երեւանը պէտք է իմանայ, որ Անգարան Պաքուէն թաքուն ծրագիրներ չունի. մենք խաղաղութեան կողմնակից ենք», եզրափակած է Չաւուշօղլու: