Կիրակի 16 Դեկտեմբեր 2012-ի առաւօտուն, յընթացս սուրբ եւ անմահ պատարագին, Անթիլասի Մայրավանքի Մայր Տաճարին մէջ Ծայրագոյն Վարդապետութեան աստիճան ստացան Մեծի Տանն Կիլիկիոյ Կաթողիկոսութեան միաբաններէն Փառէն Վրդ. Վարդանեան, Վաղինակ Վրդ. Մելոյեան, Մասիս Վրդ. Զօպուեան եւ Սիփան Վրդ. Քէչէճեան, ձեռամբ Բերիոյ թեմի Առաջնորդ Գերաշնորհ Տ. Շահան Եպս. Սարգիսեանի, խարտաւիրալութեամբ Մեսրոպ Վրդ. Սարգիսեանի:
Երկու օրեր առաջ, յիշեալ միաբանները իրենց աւարտաճառերը ներկայացուցած ու պաշտպանած էին Վեհափառ Հայրապետին, ներկայութեամբ վանաբնակ միաբան հայրերու:
Գաւազանի տուչութենէն անմիջապէս յետոյ Շահան Սրբազան խօսք առնելով շեշտեց Մեծի Տանն Կիլիկիոյ Կաթողիկոսութեան միաբանութեան հոգեմտաւոր կեանքի նոր որակ տալու կարեւորութիւնը, որ յաճախ կը շեշտուի Վեհափառ Հայրապետին կողմէ: Այդ նախանձախնդրութեան գործնական արտայայտութիւնն է ահաւասիկ չորս ծայրագոյն վարդապետներուն ներկայացուցած թէզերը, երեւոյթ մը, որ եզակի է մեր սուրբ Աթոռի կեանքին մէջ, որովհետեւ առաջին անգամ ըլլալով վարդապետներու կարգին նաեւ ծայրագոյն վարդապետները թէզ կը պատրաստեն, ստանալու համար յիշեալ աստիճանը, ըսաւ Սրբազանը:
Այս առիթով Շահան Սրբազան նաեւ անդրադարձաւ Սուրիոյ հայութեան դիմագրաւած դժուարութիւններուն, շեշտեց Սուրիահայութեան ամուր կապուածութիւնը սուրիական հայրենիքին, իր պարտաւորութիւններուն ու իրաւունքներուն եւ շնորհակալութիւն յայտնեց Վեհափառ Հայրապետին ցուցաբերած հոգածութեան համար, ինչպէս նաեւ այն բոլոր գաղութներուն ու հայորդիներուն, որոնք զանազան ձեւերով կը փորձեն օգտակար ըլլալ Սուրիոյ հայութեան:
Պատարագէն յետոյ Վեհափառ Հայրապետը չորս Ծայրագոյն վարդապետները, Շահան Սրբազանի գլխաւորութեամբ ընդունեց իր գրասենեակը, եւ իր օրհնութիւնը տուաւ անոնց: