Հանրապետութեան նախագահ զօր. Միշել Աուն երէկ կէսօրէ ետք ժամը 3:30-ին նախագահական պալատին մէջ ընդունեց վարչապետ Նեժիպ Միքաթին, որուն հետ քննարկեց հարաւային Լիբանանի մէջ արձանագրուած ապահովական զարգացումները, ինչպէս նաեւ շարունակեց կառավարութեան կազմութեան խորհրդակցութիւնները:
Շուրջ կէս ժամ տեւած հանդիպումէն ետք Միքաթի շեշտեց, որ դէպքերը արագութեամբ կը յառաջանան` աւելցնելով, որ նախագահ Աունի հետ քննարկած է նախորդ 24 ժամուան ընթացքին հարաւային Լիբանանի մէջ տիրած կացութիւնը` աւելցնելով, որ նախագահ Աուն կը հետեւի զարգացումներուն եւ կացութիւնը հանդարտեցնելու հաղորդակցութիւններուն:
Միքաթի մաղթեց, որ հարաւային Լիբանանի մէջ ապահովական կայունութիւնը վերահաստատուի` ընդգծելով, որ Լիբանան կառչած կը մնայ ՄԱԿ-ի Ապահովութեան խորհուրդի թիւ 1701 բանաձեւին գործադրութեան:
«Այս իմաստով կ՛ողջունեմ լիբանանեան բանակը եւ անոր դերակատարութիւնը` հարաւի մէջ տեղակայուած ՖԻՆԻՒԼ-ի միջազգային խաղաղապահ ուժերուն հետ գործակցութեան ընդմէջէն», ըսաւ ան:
Միքաթի նշեց, որ կառավարութեան կազմութեան հոլովոյթին մասին ինք կը փափաքի լուռ մնալ` աւելցնելով, որ նախքան նախագահ Աունի հետ հանդիպումը իր որոշումը եղած է լուռ մնալ, «որովհետեւ լռութիւնը կը մնայ աւելի խօսուն, իսկ կառավարութեան կազմութեան ջանքերը իրենց աւարտին կը մօտենան», ըսաւ ան:
Պատասխանելով ելեւմուտքի նախարարութեան փոխարէն շիի համայնքին ներքին գործոց նախարարութիւնը տրամադրելու հաւանականութեան մասին հարցումի մը` Միքաթի շեշտեց, որ այդ մասին լուրերը անհիմն են ու անճիշդ:
Ան աւելցուց, որ եթէ նախարարութիւններու հերթափոխութիւն պիտի ըլլայ, ապա անիկա պիտի ընդգրկէ բոլոր նախարարութիւնները:
Միքաթի մեկնեցաւ ըսելով, որ ինք այսօր հանրապետութեան նախագահին հետ պիտի ունենայ հեռաձայնային հաղորդակցութիւն մը, որուն ընթացքին պիտի ճշդուի յաջորդ հանդիպումին թուականը: