ՈՒԱՇԻՆԿԹԸՆ․- Ամերիկայի Հայ Դատի յանձնախումբը կը տեղեկացնէ, թէ Միացեալ Նահանգներու նախագահ Ճօ Պայտընի կողմէ առաջադրուած 2023ի ամավարկին մէջ Հայաստանին միայն 24 միլիոն տոլար նպաստ կը նախատեսուի, մինչ Արցախի համար ոչ մէկ նպաստ առաջադրուած է։ Հայաստանի համար առաջադրուած գումարը Քոնկրեսին կողմէ վաւերացուած 2022ի ամավարկին մէջ Հայաստանին տրամադրուած գումարէն 21 միլիոն տոլար նուազ է, մինչ Արցախի ականազերծումի աշխատանքներուն համար 2 միլիոն տոլար յատկացուած էր։
Ամերիկայի Հայ Դատի յանձնախումբի գործադիր վարիչ Արամ Համբարեան հիասթափութիւն յայտնեց վարչակազմին այս կեցուածքին համար՝ յիշեցնելով, որ Ուաշինկթըն 164 միլիոն տոլարի ռազմական աջակցութիւն տրամադրած էր Ատրպէյճանին։ Ան կը շեշտէ, թէ Քոնկրեսին մէջ աշխատանքը կը շարունակուի, վերջնական ամավարկին մէջ Հայաստանին եւ Արցախին յաւելեալ աջակցութիւն ապահովելու նպատակով։ Այդ արշաւին կարելի է միանալ՝ այցելելով կայքը:
Հայաստանին վերապահուած աջակցութեան 23.405.000 տոլարը նախատեսուած է յատկացնել արտաքին օգնութեան, իսկ 600.000 տոլարը՝ ռազմական օգնութեան համար վերապահուած գումարներէն է: Ասոնց կողքին, Հայաստան կրնայ ստանալ նաեւ 6 միլիոն տոլար՝ թմրեցուցիչներու տարածման դէմ պայքարի գումարներէն։
Նշենք, որ Պայտընի ամավարկին մէջ Ատրպէյճանին 9.7 միլիոն տոլարի նպաստ կ՛առաջադրուի, սակայն Պաքու կրնայ ռազմական աջակցութիւններ ստանալ պաշտպանութեան նախարարութենէն։