Միացեալ Նահանգներու, Բրիտանիոյ, Ֆրանսայի եւ Գերմանիոյ ղեկավարները քննարկած են Ուքրանիոյ մէջ ռուսական ուժերու վերահսկողութեան տակ գտնուող Զափորոժիէի հիւլէական կայանի շուրջ ստեղծուած կացութիւնը` միացեալ հեռաձայնային հաղորդակցութեան ընթացքին կոչ ուղղելով` Եւրոպայի մեծագոյն հիւլէական կայանի յարակից տարածքին մէջ զինուորական գործողութիւններու ժամանակ զսպուածութիւն ցուցաբերելու: Այս մասին հաղորդեց «Ազատութիւն» ձայնասփիւռի կայանը:
Ճօ Պայտըն, Պորիս Ճոնսըն, Էմանուէլ Մաքրոն եւ Օլաֆ Շոլց միեւնոյն ժամանակ վերահաստատած են Քիեւին իրենց աջակցութիւնը:
Անոնք նաեւ Հիւլէական ուժանիւթի միջազգային գործակալութեան կոչ ուղղած են` իր տեսուչներու անյապաղ այցելութիւն կազմակերպելու Զափորոժիէի հիւլէական կայան:
Ռուսիան եւ Ուքրանիան զիրար կը մեղադրեն հիւլէական կայանին ուղղութեամբ արձակուող կրակոցին համար: Դէտերը մտահոգ են, որ հիւլէական կայանին շուրջ զինուորական գործողութիւնները կրնան պատճառ հանդիսանալ հիւլէական նոր աղէտի մը, որ աւելի ծաւալուն պիտի ըլլայ, քան 1986 թուականի Չեռնոպիլի աղէտը: