ԵՐԵՒԱՆ, «Ազատութիւն».- Հայաստանի պաշտպանութեան նախարարութիւնը հաղորդագռութեան մը միջոցաւ հերքեց լրատուամիջոցներուն մէջ եւ ընկերային ցանցերու վրայ շրջան ընող տեղեկութիւնը, ըստ որուն իբր թէ ատրպէյճանական ստորաբաժանումները դարձեալ յառաջացած են Սիւնիքի Ներքին Հանդ գիւղին դիմացը գտնուող լեռնային տեղանքին մէջ:
«Սահմանի նշուած հատուածում ադրբեջանական ստորաբաժանումների տեղակայումն արձանագրուել է յետ-պատերազմեան շրջանում: Ընդ որում, տեղակայման փաստն արձանագրելուց անմիջապէս յետոյ Հայաստանի զինուած ուժերի կողմից ձեռնարկուել են անհրաժեշտ քայլեր՝ ադրբեջանական դիրքերը վերահսկողութեան տակ վերցնելու ուղղութեամբ, ինչի արդիւնքում նշուած տարածքում ադրբեջանական զինծառայողների շարժը լիարժէք վերահսկելի է, իսկ առաջխաղացման որեւէ փորձ կը յանգեցնի պատասխան գործողութիւնների», կ՛ըսուի հաղորդագրութեան մէջ:
Նախարարութիւնը նաեւ կոչ ուղղեց՝ անհիմն լարուածութիւն չյառաջացնելու եւ իրականութեան չհամապատասխանող տեղեկութիւններ չտարածելու:
Ըստ «Ազատութիւն» կայանին՝ այս տարուան Փետրուարին, սակայն, երբ Ներքին Հանդի բնակիչները գիւղի տարածքին մէջ ատրպէյճանական 5 վրաններ տեսան եւ ահազանգեցին այդ մասին, պաշտպանութեան նախարարութիւնը փոխնախարարին միջոցով հերքեց այդ տեղեկատուութիւնը: Աւելի ուշ բացատրեցին, որ տեղանքը մէկ տարի առաջ արդէն ատրպէյճանական դարձած է, ուղղակի եղանակային պայմաններու պատճառով ատրպէյճանցի զինուորները մեկնած են այնտեղէն եւ աւելի ուշ վերադարձած:
1 Յունիսին, «Ազատութեան» թղթակիցը զրուցեց Ներքին Հանդի քանի մը բնակիչներու հետ. Նորիկ Դանիէլեան յայտնեց, որ Փետրուարէն ի վեր նոր յառաջխաղացք չեն նկատած. «Ոչ մի բան չեն արել, չեն մօտիկացել, նոյն դիրքում էլ կանգնած են, նոյնն ա, ոչ մի բան չի փոխուել, ուղղակի էն զոհը, որ կար, պոստերն իրար մօտիկ էին, դրա համար էդ զոհը եղաւ»:
Հինգ օր առաջ Ներքին Հանդի հատուածին մէջ տեղակայուած ատրպէյճանական զինուժի կրակոցէն զոհուեցաւ ժամկէտային հայ զինուոր Դաւիթ Վահանեան:
«Կողքի պոստից, հէնց վերեւից իրենք կրակեցին մեր նոր դրուած պոստի տղաների վրայ», յայտնեց գիւղի բնակիչ Նորիկ Դանիէլեան:
Սահմանի այս նոյն հատուածէն շուրջ մէկ ամիս առաջ ժամկէտային զինուոր Էդուարդ Մարտիրոսով գերի ինկաւ. ան օրեր առաջ վերադարձուեցաւ հայկական կողմին:
Հայկական եւ ատրպէյճանական դիրքերը շատ մօտ են, կողմերը նաեւ կը փորձեն ճարտարապետական աշխատանքներ կատարել. հետեւանքը ցաւոտ միջադէպերն են: Ներքին Հանդի բնակիչներէն Ռադիկ Բաղդասարեան ըսաւ, որ գիւղին ուղղութեամբ ատրպէյճանական նոր ներխուժման մասին լուրերուն դրդապատճառը ատրպէյճանական կողմին ծաւալած շինարարութիւնն է. «Ճանապարհ ա երեւում, որ անտառը հատուած ա, կտրտուած ա, մեզ արդէն երեւում ա»:
Բաղդասարեան շեշտեց, որ ատրպէյճանցիները իրենց դիրքին մօտ շինարարութիւն կը կատարեն, այդ դիրքը Ներքին Հանդի արտերէն 60 -70 մեթրի վրայ է:
Գիւղի բնակիչները սահմանազատման գործընթացը հաւանական լուծում կը նկատեն. իրենք պատրաստ են իրենց ձեռքին տակ եղած քարտէսներով մասնակցիլ այդ գործին: «Անհամբեր սպասում եմ», նշեց Նորիկ Դանիէլեան՝ աւելցնելով. «Ինձ մօտ 47 թուականի քարտէզ կայ, էդ քարտէզով էդ ինչքան տարածքներ կան, մերն են»:
Պաշտպանութեան նախարարութիւնը հաստատեց, որ հայ-ատրպէյճանական սահմանին իրավիճակը յարաբերականօրէն կայուն է: Սակայն վերջին շրջանին ամէնօրեայ դարձած են «կրակեցիք – չկրակեցիք» մեղադրանք-հերքումները Հայաստանի ու Ատրպէյճանի ռազմական գերատեսչութիւններուն միջեւ:
1 Յունիսի առաւօտեան պաշտօնական Պաքուն տարածեց լուրեր, թէ նախորդ երեկոյէն սկսեալ, հայկական կողմը կրակի տակ պահած է իրենց դիրքերը՝ Թովուզի շրջանի Աղդամ ու Քելբաջարի Զեայլիկ բնակավայրերուն ուղղութեամբ: Զեայլիկը Վարդենիսի Վերին Շորժայի ուղղութեամբ է, համայնքապետը ըսաւ, թէ ոչ մէկ կրակոց արձակուած է, Թովուզի Աղդամը Տաւուշի Չինարիի ուղղութեամբ: