ԵՐԵՒԱՆ, «Նիուզ».- Ատրպէյճանի արտաքին գործոց նախարարութիւնը Հայաստանի վարչապետ Նիկոլ Փաշինեանի՝ Հոլանտա կատարած այցելութեան ընթացքին հնչեցուցած մեղադրանքները նկատեց «անհիմն»` նշելով, որ «անոնք կասկածի տակ կը դնեն Պաքուի հետ յարաբերութիւնները կարգաւորելու եւ տարածաշրջանին մէջ խաղաղութեան հասնելու Երեւանի անկեղծութիւնը»:
«Ատրպէյճանի հասցէին Հայաստանի վարչապետին առաջադրած անհիմն մեղադրանքները, ներառեալ իրականութենէն հեռու պնդումները՝ մարդասիրական հարցերու վերաբերեալ, ցոյց կու տան, որ Հայաստանի ղեկավարութիւնը բոլորովին անկեղծ չէ երկու երկիրներուն միջեւ յարաբերութիւններու լուծման հարցին մէջ: Հայաստանի կողմէ ականապատ դաշտերու քարտէսներու տրամադրումը «մարդասիրական ժեստէ չէ», անիկա Երեւանի պարտաւորութիւնն էր 10 Նոյեմբեր 2020ի եռակողմանի յայտարարութեամբ: Այդ փաստաթուղթի ստորագրութենէն ետք Ատրպէյճանի մէջ ականներու զոհ դարձան 219 անձեր՝ հիմնականին մէջ քաղաքացիներ», ըսաւ Ատրպէյճանի արտաքին գործոց նախարարութեան բանբեր Լէյլա Ապտուլաեւա՝ աւելցնելով. «Ինչ կը վերաբերի բանտարկուած հայերը չվերադարձնելու մեղադրանքներուն՝ Պաքուն զանոնք կը նկատէ ներթափանցողներ, որոնք Ատրպէյճանի տարածք ուղարկուած են պատերազմի աւարտէն ետք: Ատրպէյճանի հասցէին անհիմն մեղադրանքները կասկածի տակ կը դնեն յանուն խաղաղութեան գործելու Հայաստանի պատրաստակամութիւնը»։
Այսպիսով, Ատրպէյճանի արտաքին գործոց նախարարութիւնը անգամ մը եւս մեղքը դրաւ հայկական կողմին վրայ եւ հաստատեց, որ Պաքու կը հրաժարի գերիները ազատ արձակելու մասով եռակողմանի յայտարարութիւնը կատարելէ: