Խորհրդարանի նախագահ Նեպիհ Պըրրի երէկ Այն Թինէի մէջ ընդունեց Խմբագիրներու նորընտիր սենտիքայի նախագահ Ժոզեֆ Քսսայֆին եւ սենտիքայի անդամները:
Հանդիպումին ընթացքին Պըրրի շեշտեց, որ Լիբանանի դիմագրաւած տագնապներուն 99 առ հարիւրին պատճառները ներքին լիբանանեան են` աւելցնելով, որ անոնք մէկ օրուան մէջ չեն ստեղծուած, այլ` 1989-ին Թաէֆի համաձայնագիրի ստորագրութենէն ի վեր:
«Թաէֆին չզօրակցողները եւ անոր օրէնքներն ու այդ սահմանադրութիւնը չգործադրողները յայտնի են: Ափսոս որ կան տասնեակ օրէնքներ, աւելի քան 75 օրէնքներ, որոնք ո՛չ այս իշխանութեան, ո՛չ ալ նախորդ իշխանութիւններուն օրերուն գործադրուած են, օրինակ` ելեկտրականութեան վերաբերող յատուկ օրէնքը, որ պետական գանձարկղին մէջ արձանագրուած նիւթական բացին 45 առ հարիւրը պատճառած է», ըսաւ ան:
Անդրադառնալով տնտեսական, ելեւմտական եւ ապրուստի տագնապին` Պըրրի յայտնեց, որ լիբանանցի ղեկավարները դժբախտաբար այդ հարցին գծով լուռ կը մնան: «Իսկ լուծումներու յանգելու համար պէտք է խորհրդակցիլ եւ երկխօսութիւն կատարել», ըսաւ ան` աւելցնելով, որ կարելի չէ դիտել լիբանանցիներուն արտագաղթը:
Պըրրի յայտնեց, որ Լիբանան շրջափակումի ենթակայ է` հարց տալով, որ կարելի՞ է հաւատալ, թէ Իսրայէլ արաբական աշխարհին բացուած է, իսկ արաբական աշխարհը Լիբանանի դիմաց դռներ կը փակէ: «Այն Լիբանանը, որ սուղ վճարեց արաբական իր ինքնութիւնը պահպանելու համար», ըսաւ ան:
Երեսփոխանական ընտրութիւններուն մասին Պըրրի հաստատեց, որ երեսփոխանական ընտրութիւնները պիտի կատարուին սահմանադրութեամբ ճշդուած ժամկէտին ընթացքին, յարգելով Սահմանադրական խորհուրդին արձակած վճիռը, որ կը վերաբերի ընտրական օրէնքին դէմ ներկայացուած վիճարկումին:
Խորհրդարանի բարեկարգումի եւ քննչական դերակատարութեան մասին Պըրրի ըսաւ. «Սկզբունքով խորհրդարանն է, որ հաշուետուութեան պէտք է հրաւիրէ գործադիր իշխանութիւնը, սակայն ցաւ ի սիրտ ասիկա կարելի է կատարել ոչ համայնքային երկրի մը մէջ», յայտնեց ան:
Խորհրդարանի նախագահը յայտնեց, որ շիի երկեակի մասին կը խօսին շատեր` աւելցնելով, որ անիկա ազգային երկեակ է եւ ոչ թէ շիի երկեակ: «Մենք դատաւոր Թարեք Պիթարը զերծ կացուցել չենք փափաքիր, այլ` կը պահանջենք վերադառնալ օրէնքին եւ սահմանադրութեան, յատկապէս Պէյրութի նաւահանգիստի պայթումի թղթածրարին հարցով:
Պըրրի հաստատեց, որ յոռետեսութենէ դուրս գալու համար պէտք է շեշտել, որ Լիբանան սնանկացած երկիր չէ, իսկ ճիշդ է, որ Թաէֆի համաձայնագիրը Աստուածաշունչ կամ Քորան չէ, սակայն պէտք է մտածել անոր գործադրութեան մասին` որոշ ճկունութիւններով: