Խորհրդարանի նախագահ Նեպիհ Պըրրի շաբաթավերջին հրապարակեց հաղորդագրութիւն մը, որուն մէջ կը նշէ, թէ անմիջական կերպով պէտք է շարժիլ ՄԱԿ-ի Ապահովութեան խորհուրդին ուղղութեամբ` ստուգելու համար, թէ լիբանանեան գերիշխանութեան եւ իրաւունքներուն դէմ ոտնձգութիւններ կատարուա՞ծ են:
Պըրրի նշեց, որ այդ պահանջը կը ներկայացնէ նշեց, այն լուրին, թէ նաւթահորեր պեղող «Հալիպըրթըն» ընկերութիւնը Իսրայէլ-բռնագրաւուած Պաղեստին վիճելի ծովային շրջանին մէջ պեղումներ կատարելու իրաւունք ստացած է:
«Իսրայէլի կողմէ Միջերկրական ծովու Լիբանանի եւ բռնագրաւուած Պաղեստինի միջեւ վիճելի շրջաններուն մէջ գտնուող նաւթահորերու պեղումներ կատարելու նպատակով «Հալիպըրթըն» կամ որեւէ այլ ընկերութեան հետ համաձայնագիրներ ստորագրելու հոլովոյթը կը ջրէ այն շրջագիծը, որուն կը հսկեն Միացեալ Նահանգներն ու ՄԱԿ-ը: Իսկ «Թոթալ», «Նովաթեք» եւ «Էնի» ընկերութիւններուն կողմէ թիւ 9 նաւթահորին մէջ ամիսներ առաջ կատարուելիք պեղումներուն դանդաղեցումը հարցականներու դուռ կը բանայ: Իսրայէլեան գոյացութեան յանդգնութիւնը` բռնարարքներ կատարելու իմաստով, կը սպառնայ միջազգային ապահովութեան ու խաղաղութեան», կը նշէ հաղորդագրութիւնը:
Իր կարգին, վարչապետ Նեժիպ Միքաթի արտաքին գործոց եւ արտերկրի լիբանանցիներու հարցերու նախարար Ապտալլա Պու Հապիպէն պահանջեց միջազգային կողմերուն հետ համապատասխան հաղորդակցութիւններ կատարել` արգիլելու համար Իսրայէլը` նաւթահորի պեղման սկսելէ:
Միքաթի հաստատեց, որ այս իմաստով Լիբանան իր իրաւունքներուն կառչած կը մնայ եւ ոչինչ կը զիջի: «ՄԱԿ իր կարգին պէտք է արգիլէ Իսրայէլը լիբանանեան գերիշխանութեան եւ իրաւունքներուն դէմ անոր գործած ոտնձգութիւններէն», ըսաւ Միքաթի:
Պու Հապիպ հեռաձայնային հաղորդակցութիւն մը ունեցաւ ՄԱԿ-ի մօտ Լիբանանի մնայուն դեսպան Ամալ Մտալլալիի եւ Միացեալ Նահանգներու դեսպանատան հետ` նկատի ունենալով, որ Լիբանան-Իսրայէլ սահմանագծումի բանակցութիւնները հովանաւորող պետութիւնը Ամերիկան է:
Ան հաստատեց, որ պէտք է ստուգել «Հալիպըրթըն» ընկերութեան կատարելիք պեղումը եւ արգիլել լիբանանեան իրաւունքներուն մօտենալու յանդգնութիւնը, մինչեւ որ կարելի ըլլայ երկու երկիրներուն միջեւ վիճելի ծովային շրջանները ճշդել:
Այս առումով Մտալլալի բողոքի նամակ մը յղեց ՄԱԿ-ի ընդհանուր քարտուղար Անթոնիօ Կութիերեսին, ինչպէս նաեւ Ապահովութեան խորհուրդի նախագահ` Իրլանտայի ներկայացուցիչ Ճերալտին Պիռն Նէյսընի, անոնց ուշադրութեան յանձնելով, թէ շրջանառութեան մէջ դրուած են լուրեր, թէ Իսրայէլ թիւ 9 նաւթահորին մէջ պեղումներ կատարելու նպատակով միջազգային ընկերութեան մը հետ համաձայնութիւն ստորագրած է:
Լիբանան Ապահովութեան խորհուրդէն պահանջեց ստուգել, թէ վիճելի այդ շրջանին մէջ պեղումներ տեղի կ՛ունենա՞ն, Լիբանանի իրաւունքներուն եւ գերիշխանութեան դէմ գործուելիք ոտնձգութիւնները կանխելու նպատակով:
Լիբանան պահանջեց նաեւ վիճելի շրջաններուն մէջ պեղումները արգիլել` կանխարգիլելու համար այնպիսի քայլեր, որոնք կրնան միջազգային ապահովութեան եւ կայունութեան սպառնալ:
Նշենք, որ Ընկերվար յառաջդիմական կուսակցութեան ղեկավար Ուալիտ Ժոմպլաթ ընկերային ցանցերուն վրայ կատարեց գրառում մը, որուն ընդմէջէն հաստատեց, որ «Հալիպըրթըն» անունով նաւթահորեր պեղող ընկերութիւնը Իսրայէլ-բռնագրաւուած Պաղեստին վիճելի շրջանին մէջ պեղումներ կատարելու իրաւունք ստացած է: «Անիկա այդ շրջանն է, որուն մէկ մասը Լիբանան կրնար վերստանալ, եթէ յաւելաբանութիւններ չըլլային: Ասիկա կը նշանակէ իր բնական հարստութիւններուն վրայ Լիբանանի ունեցած գերիշխանութեան վերջին թիզը թաղել», ըսաւ Ժոմպլաթ: