ՀՅԴ Լիբանանի Կեդրոնական Կոմիտէի եւ Հայկական երեսփոխանական պլոքի ներկայացուցիչ, երեսփոխան Յակոբ Բագրատունի հանդիպում մը ունեցաւ խորհրդարանի նախագահ Նեպիհ Պըրրիի հետ:
Հանդիպումի ընթացքին խորհրդակցութեան նիւթ դարձան կառավարութեան կազմութեան հետ առնչուած խնդիրներն ու արգելակող ազդակները, ինչպէս նաեւ Պըրրիի կողմէ թափուող ճիգերուն յաջողութեան կարելիութիւնները:
Երեսփոխան Բագրատունի հրամայական պահանջ նկատեց արագ ու անմիջական կերպով կառավարութեան կազմութիւնը` առաջքը առնելու համար երկրի ընդհանուր փլուզումին` միաժամանակ շեշտելով, որ ՀՅ Դաշնակցութիւնը իր դիրքորոշումներով տեւաբար զօրավիգ կանգնած է սահմանադրութեան անխախտ պահպանման եւ պետական կառոյցներու գոյութեան ամրապնդման:
Խորհրդարանի նախագահ Նեպիհ Պըրրի անհրաժեշտ նկատեց ուժերու գերլարումը, որպէսզի քաղաքական կողմերը միասնաբար կարենան դուրս գալ երկիրը մաշեցնող անել վիճակէն: