Խորհրդարանի նախագահ Նեպիհ Պըրրի վաղը` հինգշաբթի, 28 մայիս 2020-ին, կէսօրէ առաջ ժամը 11:00-ին, ԵՈՒՆԵՍՔՕ-ի պալատին մէջ պիտի նախագահէ խորհրդարանի օրէնսդրական նիստին, որուն ընթացքին պիտի քննարկուի 37 կէտերէ բաղկացած օրակարգ մը:
Միւս կողմէ, Պըրրիի մօտիկ աղբիւրներ յայտնեցին, որ ան ընդվզած է միւֆթի շէյխ Ահմետ Քապալանի արտայայտութիւններէն եւ լիբանանեան վարչակարգին դէմ ուղղուած անոր քննադատութիւններէն:
Նշենք, որ Ֆիթրի եւ Դիմադրութեան ու ազատագրութեան տօներուն ընթացքին երկրին մէջ տիրող անդորրը խախտած էր միւֆթի շէյխ Ահմետ Քապալանը, երբ ան իր քարոզին մէջ ակնարկած էր այն իրողութեան, որ Պշարա Խուրիի եւ Ռիատ Սոլհի հիմնածը այլեւս անհիմն է, եւ կարելի չէ այդ ուղիով ընթանալ:
Շէյխ Քապալան քննադատած էր նաեւ քրիստոնեայ եւ իսլամ համայնքներուն միջեւ հաւասարութիւնը` պահանջելով վերջ տալ Լիբանանի համայնքային դրութեան եւ ստեղծել օրէնքի եւ ոչ համայնքային պետութիւնը: