Միացեալ Նահանգներ յանձնառու է աջակցելու Հարաւային Կովկասի շրջանին մէջ խաղաղութեան հաստատման: «Արմէնփրես» կը հաղորդէ, որ այս մասին կը նշուի Ազրպէյճանի անկախութեան օրուան առիթով Միացեալ Նահանգներու արտաքին գործոց նախարար Էնթընի Պլինքընի շնորհաւորական ուղերձին մէջ:
«Մենք յանձնառու ենք` խթանելու Ազրպէյճանի եւ Հարաւային Կովկասի շրջանին համար խաղաղ, ժողովրդավարական ու բարեկեցիկ ապագան: Մենք պատրաստ ենք աջակցելու թէ՛ երկկողմանի, թէ՛ ալ համախոհ գործընկերներու հետ համագործակցութեան միջոցով` օգնելու շրջանին գտնելու երկարատեւ համապարփակ խաղաղութիւն», կը նշուի ամերիկեան դիւանագիտութեան պետի ուղերձին մէջ:
Պլինքըն նաեւ կոչ ուղղած է կատարելու բարեփոխումներ, որոնք պիտի պաշտպանեն մարդու իրաւունքներն ու հիմնարար ազատութիւնները, որոնք նախատեսուած են Ազրպէյճանի սահմանադրութեամբ:
Միացեալ Նահանգներու արտաքին գործոց նախարարը նաեւ յայտարարած է, որ Միացեալ Նահանգներ բարձր կը գնահատէ Ուքրանիոյ հարցին մէջ Ազրպէյճանի ցուցաբերած աջակցութիւնը: