Շաբաթ, 4 յունիսին Պուրճ Համուտի քաղաքապետ Մարտիկ Պօղոսեան շրջանի բնակչութեան, ուղղեց հետեւեալ կոչը, ուր կը նշուի, թէ քաղաքապետութիւնը անհրաժեշտ միջոցներուն դիմած է Պուրճ Համուտի մէջ աղբահաւաքման առկախ մնացած հարցը լուծելու: Առ այդ, կը թելադրուի բնակիչներուն այս հարցով համագործակցելու Պուրճ Համուտի քաղաքապետութեան հետ:
Պուրճ Համուտի յարգելի՛ ժողովուրդ եւ բնակիչներ,
Ինչպէս նկատեցիք, Բարգաւաճման եւ վերակառուցման խորհուրդին միջոցով լիբանանեան կառավարութեան հետ պայմանագրուած «Ռամքօ» ընկերութիւնը վերսկսած է շրջանի փողոցներէն ու հանրային վայրերէն աղբահաւաքման եւ աւլելու աշխատանքներուն:
Քաղաքապետութիւնը կրցաւ նաեւ համագործակցիլ իտալական «Չեսվի» ընկերութեան հետ, որ ժամանակաւորապէս քաղաքապետութեան տրամադրութեան տակ պիտի դնէ քանի մը աշխատաւորներ` ապահովելու համար շրջանի ընդհանուր մաքրութեան եւ ենթակառոյցի նորոգութեան թէ սպասարկման տարրական աշխատանքները:
Այսօր, այս կոչով կը դիմենք ձեզի` խնդրելով քաղաքապետութեան հետ ձեր գործակցութիւնն ու աջակցութիւնը, պահպանելու համար մեր քաղաքի, ձե՛ր քաղաքի մաքրութիւնը` մեր, ձե՛ր փողոցներով, պարտէզներով եւ բացօթեայ վայրերով:
Մէկ կողմէ, մաքրութեան պահպանումը համազօր է մաքրութեան աշխատանքին, հետեւաբար` կոչ կ՛ուղղենք պահպանելու ընդհանուր մաքրութիւնը եւ յարգելու աղբահաւաքման փոխադրակառքերու ժամանման ժամերը եւ ձեր աղբերու պարկերը ամուր գոցուած վիճակով զետեղելու ճշդուած տեղերը, որպէսզի չերկարի անոնց մնալը փողոցներուն մէջ, եւ անոնք չտարածուին:
Միւս կողմէ, վստահաբար ձեր աչքերէն չէ վրիպած աղբահաւաքման փոքր փոխադրակառքերու թէ այլ ինքնաշարժներու շրջան մուտքն ու իրենց աղբակոյտերու թափօնը անկանոն ձեւով շրջանին մէջ թափելու երեւոյթը` իր պատճառած կենսոլորտային թէ առողջապահական վնասներով: Տիրող նիւթական տագնապներու եւ քաղաքապետութեան ունեցած սահմանափակ մարդուժին պատճառով, կը դիմենք ձեզի` գործակցելու եւ աջակցելու քաղաքապետութեան, «Իւրաքանչիւր քաղաքացի պահակ է» սկզբունքով, յաղթահարելու այս երեւոյթը` նկարելով այդ փոխադրակառքերը, երբ անոնց շրջան մուտք գործելը նկատէք, եւ տեղեակ պահելով քաղաքապետութեան ոստիկանութիւնը` հեռաձայնելով 01/260155 հեռախօսի թիւին եւ յանձնելով այդ նկարները, որպէսզի կարելի ըլլայ զանոնք հետապնդել օրինական միջոցներով:
Նոյնն է պարագան ինչ կը վերաբերի աղբակոյտերու մէջ փնտռտուքի եւ պարկերու պարունակած աղբերու տարածման` փողոցներուն եւ մայթերուն վրայ, ինչ որ բացարձակապէս անընդունելի եւ ապօրինի քայլ է:
Վստահ ենք, որ գործակցութիւնն ու համերաշխութիւնը կը նպաստեն, որ ընկերութիւնները կարենան յաղթահարել մարտահրաւէրները:
Համակ յոյս ենք, որ ձեր գործակցութիւնը` ի սպաս մեր քաղաքին, ձե՛ր քաղաքին ու ժողովուրդին` պիտի յանգի այս տագնապներու լուծման եւ կացութեան բարելաւման:
Կը վերահաստատենք, որ Պուրճ Համուտի քաղաքապետութիւնը իր լրիւ անձնակազմով կը շարունակէ մնալ ի սպաս այս քաղաքի ծառայութեան ու ճիգ չի խնայեր անոր ժողովուրդի ծառայութեան համար:
ՊՈՒՐՃ ՀԱՄՈՒՏԻ ՔԱՂԱՔԱՊԵՏ
ՄԱՐՏԻԿ ՊՕՂՈՍԵԱՆ