Արտաքին գործոց եւ արտերկրի լիբանանցիներու հարցերու նախարարի պաշտօնակատար Ապտալլա Պու Հապիպ երէկ այցելեց Մարոնիներու լիկայի կեդրոնը, ուր դիմաւորուեցաւ լիկայի նախագահ, դեսպան Խալիլ Քարամի կողմէ:
Հանդիպումին ընթացքին քննարկուեցան Լիբանանի ներկայ իրավիճակն ու մարտահրաւէրները, որոնց շարքին` սուրիացի տեղահանուածներու տունդարձի թղթածրարը, նախագահական ընտրութեան սահմանադրական գործընթացը եւ այլն:
Պու Հապիպ զգուշացուց նախագահական ընտրութիւնը սահմանադրութեամբ ճշդուած ժամկէտին չկատարելու հաւանականութենէն` աւելցնելով, որ անիկա բազում վտանգներ կրնայ յառաջացնել Լիբանանի համար:
Պու Հապիպ հաստատեց, որ երկիրը կարելի չէ կառավարել ընթացիկ հարցերու կառավարութեամբ:
Անդրադառնալով ծովային սահմանագծումի հարցին` Պու Հապիպ ընդգծեց Լիբանանի միացեալ կեցուածքը, յատկապէս ինչ կը վերաբերի թիւ 23 սահմանագիծի ու Կանայի նաւթահորի պահանջներուն կառչածութեան:
«Ծովային սահմանագծումի բանակցութիւնները ընթացքի մէջ են, մինչեւ որ Լիբանան ամերիկացի բանագնաց Էյմըս Հոքշթայնէն իմանայ Իսրայէլի կեցուածքը», ըսաւ ան` աւելցնելով, որ Հոքշթայնի Լիբանան կատարելիք այցելութեան թուականը տակաւին չէ ճշդուած:
Սուրիացի տեղահանուածներու տունդարձին մասին Պու Հապիպ յայտնեց, որ այս առումով եւս լիբանանեան միացեալ կեցուածք մը գոյութիւն ունի` աւելցնելով, որ այդ թղթածրարին հետեւող նախարարական յանձնախումբ մը կայ:
Պու Հապիպ ակնարկեց նաեւ Պրիւքսելի մէջ իր մասնակցած ժողովին արդիւնքներուն` նկատել տալով, որ Եւրոպական Միութենէն խնդրած է օժանդակել Լիբանանին` սուրիացի տեղահանուածներու տունդարձի ծրագիրը գործադրելով:
Ան յայտնեց, որ ժողովին մասնակցող արաբական երկիրները զօրակցած են լիբանանեան կեցուածքին, հակառակ կարգ մը եւրոպական երկիրներու, որոնք մերժեցին տեղահանուածներու տունդարձը` պահանջելով անոնց համարկումը լիբանանեան հասարակութեան:
Կէսօրէ ետք Պու Հապիպ այցելեց խորհրդարանի նախագահ Նեպիհ Պըրրիի, որուն հետ քննարկեց լիբանանեան իրադարձութիւնները: