Խորհրդարանի փոխնախագահ Էլիաս Պու Սաապի տեղեկատուական գրասենեակը երէկ հրապարակեց հաղորդագրութիւն մը, որ կը նշէ, թէ Պու Սաապի եւ Լիբանան-Իսրայէլ ծովային սահմանագծումի անուղղակի բանակցութիւնները վարող ամերիկացի բանագնաց Էյմըս Հոքշթայնի միջեւ արձանագրուած է երկար տեւած հեռաձայնային հաղորդակցութիւն մը:
Հաղորդակցութեան ընթացքին Հոքշթայն Պու Սաապին ներկայացուցած է իսրայէլացի պատասխանատուներուն հետ իր ունեցած հաղորդակցութիւններուն արդիւնքները` աւելցնելով, որ յառաջիկայ օրերուն ինք պիտի շարունակէ իսրայէլացի պատասխանատուներուն հետ իր խորհրդակցութիւնները:
Հոքշթայն Պու Սաապին յայտնեց, որ դարձեալ պիտի հաղորդակցի անոր հետ` ստուգելու համար որոշ կէտեր, որոնց հիման վրայ գրաւոր պատկերացում մը պիտի պատրաստէ Լիբանան կատարած իր վերջին այցելութեան ընթացքին ունեցած իր խորհրդակցութիւններուն մասին:
Պու Սաապ եւ Հոքշթայն անդրադարձան նաեւ միջազգային, արաբական եւ տեղական մամուլին ու տարբեր լրատուամիջոցներուն կողմէ ծովային սահմանագծումին վերաբերող մերթ ժխտական եւ երկու օր առաջ դրական լուրերուն ու տեղեկութիւններուն: Անոնք հաստատեցին, որ այդ լուրերը ոչ մէկ յստակ տուեալի կամ պաշտօնական կեցուածքի վրայ հիմնուած են, հետեւաբար անոնք վարկածներ են եւ կարծիքներ:
Իր կարգին, Պու Սաապ ընդգծեց Լիբանանի կեցուածքը, անդրադառնալով, որ ժամանակի ազդակը ճնշող է: Այս շրջագիծին մէջ Պու Սաապ շեշտեց ընդունելի ժամկէտներու ծիրին մէջ աշխատելու կարեւորութիւնը` արդիւնաբեր դարձնելու համար բանակցութիւնները:
Պու Սաապ հաստատեց, որ պէտք չէ լաւատեսութեամբ կամ յոռետեսութեամբ չափազանցել` նկատի ունենալով, որ հաղորդակցութիւնները տակաւին ընթացքի մէջ են:
«Պէտք է նկատի ունենալ, որ Լիբանան կը բանակցի եւ հզօր դիրքէ կը բանակցի, ամրապնդուած` պաշտօնական միասնական կեցուածքով», յայտնեց Պու Սաապ` աւելցնելով, որ ինք հանրապետութեան նախագահ զօր. Միշել Աունը, խորհրդարանի նախագահ Նեպիհ Պըրրին եւ վարչապետ Նեժիպ Միքաթին տեղեակ պահած է` Հոքշթայնի հետ ունեցած իր հաղորդակցութեան մանրամասնութիւններուն մասին: