Ուքրանիոյ ժողովուրդը եւ նախագահ Վոլոտիմիր Զելենսքիի գլխաւորած կառավարութիւնը պէտք է առանձին որոշեն տարածքային զիջումներու կարելիութեան հարցը, Միացեալ Նահանգներ չի պատրաստուիր իրենց դիրքորոշումը պարտադրելու: «Փի.Պի.Էս.»-ի հետ հարցազրոյցի ընթացքին յայտնած է Միացեալ Նահանգներու արտաքին գործող նախարար Էնթընի Պլինքըն:
«Ուքրանիոյ ապագան ուքրանացիներու ձեռքերուն մէջ է: Այդ որոշումները պէտք է կայացնեն ուքրանացի ժողովուրդն ու ժողովրդավարական ճամբով ընտրուած կառավարութիւնը, ներառեալ նախագահ Զելենսքին: Անոր որոշելիքն է, թէ ի՛նչ կը բխի իր երկրին շահերէն: Մենք ալ պիտի զօրակցինք», լրագրողներու հարցումին ի պատասխան ըսած է Պլինքըն:
Միացեալ Նահանգներու արտաքին գործոց նախարարը աւելցուցած է, որ Միացեալ Նահանգներ ու արեւմտեան երկիրները «օրը 24 ժամ, շաբաթը 7 օր կ՛աշխատին, որպէսզի համոզուին, որ անոնք (ուքրանացիները, «Ա.») պիտի ստանան այն ամէնը, ինչ որ անհրաժեշտ է` Ռուսիոյ դէմ պատերազմ մղելու համար»:
Միւս կողմէ, Միացեալ Նահանգներու պաշտպանութեան նախարարութեան թուիթըրեան պաշտօնական էջին վրայ զետեղուած է պաշտպանութեան նախարար Լոյտ Օսթընի հետեւեալ մէջբերումը. «Ռուսական ներխուժումը օրինակ է այն բանին, թէ ի՛նչ տեղի կ՛ունենայ, երբ մեծ տէրութիւնները կ՛որոշեն, որ իրենց կայսերական ախորժակները աւելի կարեւոր են, քան իրենց խաղաղ դրացիներու իրաւունքները»:
«Ռուսական ներխուժումը այն է, ինչ որ տեղի կ՛ունենայ, երբ ճնշողները կը խախտեն մեզ բոլորս պաշտպանող կանոնները: Եւ ատիկա քաոսի եւ իրարանցումի հաւանական աշխարհի նախադիտումն է, որուն մէջ մեզմէ ոչ ոք կ՛ուզէր ապրիլ», աւելցուցած է Փենթակոնի ղեկավարը:
«Վոյեննոյէ Օպոզրենիէ» իր կարգին հաղորդեց, որ Եւրոպայի մէջ ՕԹԱՆ-ի ուժերու նախկին հրամանատար Ուեսլի Քլարք յայտարարած է. «Հակառակ զէնքի եւ սպառազինութեան մատակարարման, Ուքրանիան Ռուսիայէն կը պարտուի»: Անոր համաձայն, առանց լրացուցիչ օգնութեան, Քիեւի վարչակարգին վրայ կարելի է խաչ քաշել:
Ամերիկացի զօրավարը խօսք արտասանած է «Ատլանտեան խորհուրդ»-ին մէջ` ըսելով, որ առանց ՕԹԱՆ-ի օգնութեան Ուքրանիան չի կրնար յաղթել Ռուսիոյ: Անոր համաձայն, դաշինքին անհրաժեշտ է միջամտել տագնապին եւ Ռուսիոյ ստիպել դադրեցնել զինուորական յատուկ գործողութիւնը:
Քլարք համոզուած է, որ ՕԹԱՆ-ի ղեկավարութեան կողմէ ներկայիս վարուող չմիջամտելու քաղաքականութիւնը արդէն հինցած է, դաշինքը պէտք է «ռուսական նախայարձակումին» պատասխանէ: