ՄՈՍԿՈՒԱ, «Փոլիթէքսփըրթ»․- Տումայի Պաշտպանական հարցերու յանձնախումբի առաջին փոխնախագահ Ալեքսանտր Շերին մեկնաբանեց Արցախ տագնապին մէջ Թուրքիոյ ներգրաւուածութիւնը` նշելով, որ Անգարա կը փորձէ «վերադարձնել Կովկասը»:
«Թուրքիոյ հետ բոլոր մեղմ յարաբերութիւնները ոչ թէ իբրեւ դիւանագիտական մշակոյթ, այլ թուլութեան դրսեւորում կ՛ընկալուին», նշեց Շերին՝ շեշտելով, որ «Հարաւային Կովկասի մէջ Թուրքիոյ քիթը պէտք է կտրել»:
Երեսփոխանը նաեւ յիշեցուց Հայաստանի մէջ ռուսական ռազմակայանին մասին եւ զգուշացուց, որ պատշաճ արձագանգի բացակայութեան պարագային շուտով Ատրպէյճանի մէջ պիտի յայտնուի թրքական կամ ՆԱԹՕի ռազմակայան:
«Փաստօրէն Թուրքիա պատերազմ սկսած է Ռուսիոյ դէմ, մեզի համար ռազմավարական կարեւորութիւն ունեցող շրջանին մէջ: Սկսած է Ատրպէյճանի եւ արաբ ահաբեկիչներու ձեռքով, իսկ Ռուսիոյ մէջ այդ փաստը իբրեւ թէ չեն նկատեր՝ աւելցնելով, որ Ռուսիա շրջանին մէջ պէտք է պաշտպանէ Հայաստանը` իբրեւ իր ռազմավարական դաշնակիցը, ինչպէս նաեւ Արցախի բնակչութիւնը, որ կը բախի ցեղասպանութեան սպառնալիքին», իր կարգին ըսաւ Եւրասիական տնտեսական միութեան հիմնարկի գործադիր տնօրէն Վլատիմիր Լեփիոխին: