ԵՐԵՒԱՆ, «Ազատութիւն».- Տարածաշրջանային հաղորդակցութիւններու ապաշրջափակման հարցերու Հայաստանի, Ատրպէյճանի եւ Ռուսիոյ փոխվարչապետներու աշխատանքային խումբը կրցած է մօտեցնել Երեւանի եւ Պաքուի դիրքորոշումները՝ բազմաթիւ հարցերու, մասնաւորապէս` սահմանային եւ մաքսային հսկողութեան վերաբերեալ: Այս մասին ռուսական «Թասս» լրատուական գործակալութեան հետ ունեցած զրոյցին ընթացքին յայտնեց Հայաստանի փոխվարչապետ Մհեր Գրիգորեան:
Ան կառուցողական նկատեց Հարաւային Կովկասի մէջ հաղորդակցութեան կապերու ապաշրջափակման եռակողմ աշխատանքային խումբի գործունէութիւնը:
«Կողմերին յաջողւում է մօտեցնել իրենց դիրքորոշումները սահմանային եւ մաքսային հսկողութեան բազմաթիւ հարցերի շուրջ, ինչպէս նաեւ Հայաստանի եւ Ադրբեջանի տարածքներով աւտոմոբիլային (ինքնաշարժներու) եւ երկաթուղային ճանապարհներով քաղաքացիների անվտանգ երթեւեկութեան, տրանսպորտային (փոխադրութեան) միջոցների եւ բեռների տեղաշարժի վերաբերեալ», ըսաւ Գրիգորեան՝ աւելցնելով. «Այս պահին փորձագիտական ենթախմբերը շարունակում են աւտոմոբլիլային ու երկաթուղային ենթակառուցուածքների վերականգնման ու հետագայ օգտագործման հետ կապուած հարցերի մշակումը»:
Երեք երկիրներու փոխվարչապետներու վերջին հանդիպումը տեղի ունեցաւ 20 Յունիսին՝ Ս. Փեթերսպուրկի մէջ։
Եռակողմ աշխատանքային խումբի նիստը տեղի ունեցաւ 4 Յունիսին, Մոսկուայի մէջ։
Հանդիպման արդիւնքներուն մասին Ռուսիոյ կառավարութիւնը հաղորդեց, որ կողմերը մերձեցուցած են իրենց մօտեցումները՝ Ատրպէյճանի եւ Հայաստանի տարածքներով ինքնաշարժներու եւ երկաթուղային ճանապարհներուն սահմանային, մաքսային ու հսկողութեան այլ տեսակներու հարցերու շուրջ: