Շաբաթավերջին Անգլիոյ Փըրըմիէր Լիկ-ի ընդհանուր դասաւորման գլխաւոր երեք դիրքերը գրաւող խումբերը տօնեցին յաղթանակ: Ուշագրաւ էր, որ յաղթանակները երեքին ալ պարագային, վիճելի փենալթի հարուածներու շնորհիւ արձանագրուեցան:
Մանչեսթըր Սիթի շնորհիւ Ռահիմ Սթերլինկի նշանակած 100-րդ կոլին, նուազագոյն՝ 1-0 արդիւնքով յաղթանակ մը արձանագրեց Վուլվզի դէմ: Փեփ Կուարտիոլայի կազմը ներկայիս մէկ կէտի աաւելութիւն մը կը վայելէ ընդհանուր դասաւորման երկրորդ դիրքը գրաւող Լիվըրփուլին նկատմամբ:
«Կարմիրներ»ը Էնֆիլտ Ռոտ մարզադաշտին մէջ ընդունեցին Ասթոն Վիլան, որուն գլխաւոր մարզիչը Սթիվըն Ճերարտը բուռն ծափահարութիւններով դիմաւորուեցաւ, նկատի ունենալով, որ Ճերարտ՝ 1998-էն 2015 կրած էր Լիվըրփուլի շապիկը: Լիվըրփուլ, շնորհիւ Մուհամմէտ Սալահի 67-րդ վայրկեանին նշանակած կոլին (փենալթի) կարեւոր յաղթանակ մը տարաւ Վիլայի դէմ: Մրցումին վերջին վայրկեաններուն իրաւարարը կրնար փենալթի մը շնորհել Վիլային, սակայն զլացաւ:
Սթեմֆորտ Պրիճ մարզադաշտին մէջ, Լիծ Եունայթըտ բաւական անբախտ դուրս եկաւ, երբ 3-2 արդիւնքով պարտութիւն մը կրեց Չելսիէն: Ճորճինիօ (երկու փենալթի) եւ Մաունթ նշանակեցին «Կապոյտներ»ուն կոլերը: Լիվըրփուլ կը գրաւէ ընդհանուր դասաւորման երկրորդ դիրքը, Չելսի՝ երրորդ:
Արսենալ՝ 3-0 արդիւնքով պարտութեան մատնեց Սաութեմթընը, մինչ Մանչեսթըր Եունայըտ, Ռոնալտոյի նշանակած փենալթիով՝ 1-0 արդիւնքով պարտութեան մատնեց Նորուիչ Սիթիին, վերջնոյն՝ Քերօ Ռոտ մարզադաշտին մէջ:
Գերմանիոյ մէջ Պայերն Միւնիխ շնորհիւ Քինկսլի Քոմանի եւ Ճամալ Մուսիալայի կոլերուն՝ 2-1 արդիւնքով պարտութեան մատնեց Մայնցը: Պաւարիական խումբը ներկայիս եօթ կէտերու առաւելութիւն մը կը վայելէ երկրորդ դիրքի վրայ գտնուող Պորուսիա Տորթմունտին նկատմամբ: Վերջինս՝ 1-1 արդիւնքով հաւասարութեամբ մը գոհացաւ Պոխումի դէմ:
Լայփցիկ, իր նոր մարզիչին Տոմենիքօ Թետեսքոյի «հրամանատարութեան» տակ՝ 4- 1 արդիւնքով յաղթանակ մը արձանագրեց Պորուսիա Մէոնշենկլատպախի դէմ:
Իտալիոյ մէջ Եուվենթուս կը շարունակէ ձախորդ ելոյթներու շարքը: «Ծեր պառաւ»ը շաբաթ օր՝ 1-1 արդիւնքով հաւասարութիւն մը արձանագրեց Վենեզիայի համեստ կազմին դէմ: Վերջինս իր նախորդ չորս մրցումներուն պարտութեամբ հեռանացած էր դաշտէն: Ալվարօ Մորաթա նշանակեց Մասիմիլիանօ Ալեկրիի խումբին որբ կոլը:
Իտալիոյ ֆութպոլի ախոյեանութեան ընդհանուր դասաւորումը գլխաւորող Ա.Սէ Միլանի կազմը՝ 1-1 արդիւնքով հաւասարութիւն մը ձեռք բերաւ Ուտինեզիէն: Պեթթօ յառաջ մղեց տանտէրերը, սակայն շուէտացի յառաջապահ Զլաթան Իպրահիմովիչ «աքրոպաթիք ֆինիշինկ»ով հաւասարութեան կէտ մը խլեց Ուտինեզիէն: Կոլը՝ Իպրահիմովիչի 300-րդն էր եւրոպական ֆութպոլի ախոյեանութեան հինգ գլխաւոր երկիրներուն մէջ կրած խումբերուն շապիկով:
Սպանիոյ մէջ, Սեւիլիա՝ 1-0 արդիւնքով պարտութեան մատնեց Աթլեթիք Պիլպաօն՝ Թոմաս Տելանի նշանակեց Սեւիլիայի կոլը: Պարսելոնա՝ 2-2 արդիւնքով ոչ համոզիչ հաւասարութիւն մը արձանագրեց Օսասունայի դէմ: Ռէալ Մատրիտ կը շարունակէ գլխաւորել Սպանիոյ ախոյեանութեան ընդհանուր դասաւորումը: