ՆԻՒ ԵՈՐՔ.- Ճգնաժամէ ճգնաժամ։ Ամերիկեան «Սի.Էն.Էն.» լրատուական գործակալութիւնը այսպէս որակած է նախագահ Տանըլտ Թրամփի 2017-ի գործելաոճը՝ աւել-ցնելով, որ Թրամփին կարելի է շնորհել «2017-ի ճգնաժամերու հեղինակ» անունը, նկատի ունենալով մէկէ աւելի ճակատներու վրայ շարունակուող միջազգային հակամարտութիւններուն Ամերիկայի մասնակցութիւնը կամ անոր կողմէ հրահրումը, որոնցմէ վերջինն էր Երուսաղէմը Իսրայէլի մայրաքաղաք ճանչնալու խնդրայարոյց որոշումը։
Ըստ «Սի.Էն.Էն.»ի՝ առաջին ճակատը «Իսլամական պետութեան» եւ առհասարակ ահաբեկչութեան դէմ Ամերիկայի մղած պայքարն է, որուն ընթացքին թէեւ Սուրիոյ եւ Իրաքի ահաբեկչական խումբերը պարտութիւն կրեցին, սակայն Ամերիկայի մասնակցութիւնը ջնջին էր, եւ վերջին հաշուով՝ յաղթանակը վերագրուեցաւ Ռուսիոյ եւ Իրանի դաշնակից Սուրիոյ ու Իրաքի բանակներուն։
Երկրորդ կարեւորագոյն ճակատը Հիւսիսային Քորէայի դէմ թշնամութեան ալիքն էր, որուն ընթացքին Թրամփ ջանք չխնայեց այդ համայնավար երկրի նախագահին զայրոյթը սաստկացնելու եւ զայն մղելու, որ ան Ամերիկայի ուղղութեամբ հրթիռներ արձակելու սպառնալիքներ հնչեցնէ, միաժամանակ բազմացնելով հիւլէական ռումբերու փորձերը։
«Սի.Էն.Էն.»ը նաեւ կ՛անդրադառնայ Թրամփի կողմէ Պաղեստինեան իշխանութեան նախագահ Մահմուտ Ապպասին տրուած այն խոստումին, թէ պաղեստինեան հարցին արդար լուծում պիտի տայ եւ Երուսաղէմի վերաբերեալ որոշումները պիտի յետաձգէ, մինչեւ որ քաղաքական լուծում մը տրուի հակամարտութեան։ Թրամփ, սակայն, միայն ութ ամիս ետք դրժեց իր խոստումը եւ Երուսաղէմը Իսրայէլի մայրաքաղաք ճանչնալով՝ պատճառ դարձաւ, որ Պաղեստինի ու Իսրայէլի միջեւ լարուածութիւնը աւելիո՛վ սրի։