Ամերիկեան Wall Street Journal թերթը, վկայակոչելով ամերիկացի պաշտօնատարներ՝ կը յայտնէ թէ Ռուսիա վերջերս բազմաթիւ սուրիացի վարձկաններ զինուորագրած է Ուքրանիոյ մէջ կռուելու համար, որովհետեւ անոնք քաղաքային պատերազմի մէջ բաւական փորձառութիւն ձեռք ձգած են։
Ըստ ամերիկացի պաշտօնատարներու՝ վարձկանները պիտի մասնակցին յատկապէս Քիեւը գրաւելու գործողութեան։
Երկու կողմերուն կողքին մեծ թիւով օտարներ զինուորագրուած են եւ մաս կը կազմեն ռազմական գործողութիւններուն։ Չեչենիոյ ղեկավար Ռամզան Քատիրով, որ Քրեմլինի դաշնակիցն է, հրապարակած է տեսանիւթ մը, որուն մէջ չեչեն մարտիկներ կը պատերազմին Ուքրանիոյ մէջ։
Միւս կողմէ, ուքրանական կողմն ալ կը հաստատէ, թէ բազմաթիւ օտար կամաւորներ հասած են Ուքրանիա եւ միացած են երկրի ուժերուն։ Ըստ ուքրանացի արտաքին գործոց նախարար Տմիթրօ Քուլեպայի՝ օտար կամաւորներու թիւը «հազարներ»ու կը հասնի։
Նշենք, որ Արցախի 44օրեայ պատերազմին ընթացքին, Ատրպէյճան հազարաւոր սուրիացի վարձկաններ օգտագործած էր հայկական ուժերուն դէմ եւ հակառակ հայկական կողմին բարձրացուցած կոչերուն՝ միջազգային ընտանիքը ընդհանրապէս լուռ մնաց այդ գծով։