Ուրբաթ, 12 Յունուարին, Ֆրանսայի Վալանս քաղաքի «Արմէնիա» միութիւնը Պուրկ-լէ-Վալանսի «Jean Moulin» սրահին մէջ կազմակերպած էր «Cuisine d’Armenie» («Հայաստանի խոհանոցը») գիրքի շնորհանդէսը` մասնակցութեամբ գիրքի հեղինակներ քոյր եւ եղբայր Ռիշար եւ Կորին Զարզաւաջեաններու:
Ինչպէս «Հայերն այսօր»-ին կը յայտնեն «Արմէնիա» միութենէն, «Cuisine d’Armenie» («Հայաստանի խոհանոցը») գիրքը մեծ աղմուկ հանած է Ֆրանսայի մէջ, ներկայացուած Ֆրանսայի հեռուստատեսութեամբ, ռատիոյով եւ թերթերով:
Ռիչարտ Զարզաւաջեան France 2 հեռուստաընկերութեան լրագրող է, իսկ Կորին Զարզաւաջեան, որ վերջերս Հայաստան այցելած էր, դերասանուհի է:
Գիրքը կը պարունակէ հայկական շուրջ 100 ճաշատեսակ` լուսանկարներով եւ բաղադրատոմսերով: Այն մեծ համբաւ կը վայելէ Ֆրանսայի մէջ եւ արդէն վաճառուած է գիրքի քանի մը հազար օրինակ:
Երեկոյին ներկայ էին 80-է աւելի մարդիկ, որոնց շարքին էին Վալանսի հայկական միութիւններու ներկայացուցիչներ: Ձեռնարկին ներկայ էին նաեւ Վալանսի եւ Պուրկ-լէ-Վալանսի քաղաքապետարաններու անդամներ:
«Արմէնիա» միութեան նախագահ, լրագրող-ծաղրանկարիչ Գրիգոր Ամիրզայեան իր ելոյթին մէջ շնորհակալութիւն յայտնեց հիւրերուն` գրական երեկոյին ներկայ ըլլալու համար:
Այնուհետեւ Ռիշար եւ Կորին Զարզաւաջեանները ներկայացուցին գիրքը, պատասխանեցին ներկաներու հարցերուն եւ մակագրեցին գիրքերը:
Աւարտին տեղի ունեցաւ փոքրիկ հիւրասիրութիւն: Գրիգոր Ամիրզայեան ներկաներուն հրաւիրեց ճաշակելու հայկական կերակրատեսակներ եւ գինի:
Յաջորդ օրը` Շաբաթ, 13 Յունուարին, «Cuisine d’Armenie» («Հայաստանի խոհանոցը») գիրքի շնորհանդէսը կայացաւ Վիեն քաղաքի «Lucioles» գրադարանին մէջ եւ քաղաքի կեդրոնը գտնուող հայկական «Les Frangins» ճաշարանին մէջ: Նոյն օրը գիրքը ներկայացուեցաւ Լիոնի «Bahadourian» հայկական հաստատութեան մէջ, որ կը գտնուի «Halles de Lyon» կեդրոնին մէջ: