Հանրապետութեան նախագահ զօր. Միշել Աուն երէկ առաւօտեան Պաապտայի մէջ ընդունեց վարչապետ Նեժիպ Միքաթին, որուն հետ քննարկեց երկրին տարբեր մարզերը յուզող հարցերը, ինչպէս նաեւ կառավարութեան իրավիճակին վերաբերող զարգացումներուն կապուած խնդիրներ:
Հանդիպումին ընթացքին վարչապետ Միքաթի նախագահ Աունին ներկայացուց Ֆրանսայի նախագահ Էմանուէլ Մաքրոնի եւ Սէուտական Արաբիոյ գահաժառանգ իշխան Մոհամետ պըն Սալմանի միջեւ քննարկուած հարցերը` Ժետտայի հանդիպումին ընթացքին:
Նախագահ Աուն Միքաթիի հետ քննարկեց նաեւ շարք մը դասաւորումներ, որոնք պէտք է որդեգրուին` անմիջական հարցեր լուծելու նպատակով:
Միւս կողմէ, նախագահ Աուն եւ վարչապետ Միքաթի ներկայ գտնուեցան Լիբանանի մէջ Ֆրանսախօս երկիրներու կազմակերպութեան Միջին Արեւելքի գրասենեակի բացման համաձայնագիրի ստորագրութեան` նկատի ունենալով, որ այդ գրասենեակին կեդրոնը Պէյրութի մէջ է:
Համաձայնագիրը ստորագրեցին արտաքին գործոց նախարար Ապտալլա Պու Հապիպ եւ Ֆրանսախօս երկիրներու կազմակերպութեան տնօրէն Ճոֆրուա Մոնփըթի:
Այս առիթով Ֆրանսախօս երկիրներու կազմակերպութեան մէջ նախագահ Աունի անձնական ներկայացուցիչ Ժարժուրա Հարտան յայտնեց, որ Միջին Արեւելքի մէջ Ֆրանսախօս երկիրներու կազմակերպութեան ներկայացուցչութեան գրասենեակը Պէյրութի մէջ կարելի պիտի չըլլար ստեղծել, եթէ նախագահ Աուն այդ մասին առաջարկ ներկայացուցած չըլլար Երեւանի մէջ տեղի ունեցած Ֆրանսախօս երկիրներու կազմակերպութեան խորհրդաժողովին ընթացքին:
Հարտան հաստատեց, որ օրին տրուած որոշումը կարեւոր էր` նկատի ունենալով կազմակերպութեան մէջ Լիբանանի ունեցած պատմական դերակատարութիւնը:
Նախագահ Աունի այցելեց նաեւ պաշտպանութեան նախարար Մորիս Սլիմը: Քննարկուեցան երկրին ապահովական իրադարձութիւնները, ինչպէս նաեւ նախարարութեան պատկանող հաստատութիւններուն աշխատանքներն ու զինուորներուն կարիքները` տիրող ներկայ պայմաններուն ընթացքին: