Հայաստանի վարչապետ Նիկոլ Փաշինեան կը սպասէ, որ Ազրպէյճանի նախագահ Իլհամ Ալիեւ ընդունի Լեռնային Ղարաբաղի տագնապի խաղաղ լուծման իր առաջարկած բանաձեւը, ըստ որուն որեւէ լուծում պէտք է ընդունելի ըլլայ Հայաստանի, Արցախի եւ Ազրպէյճանի ժողովուրդներուն համար: «Արմէնփրես»-ի փոխանցումով` այս մասին Փաշինեան յայտնած է «Ֆոքս ԼԱ»-ի լրագրող Արաքսիա Կարապետեանի հետ զրոյցի մը ընթացքին:
«Մենք պատրաստ ենք լուծումներ գտնելու Լեռնային Ղարաբաղի տագնապի խաղաղ լուծման համար: Ուղերձս այն է, որ տագնապի որեւէ լուծում պէտք է ընդունելի ըլլայ Հայաստանի, Ղարաբաղի եւ Ազրպէյճանի ժողովուրդներուն համար: Ես Հայաստանի Հանրապետութեան առաջին առաջնորդն եմ, որ կ՛ըսէ, թէ լուծումը պէտք է ընդունելի ըլլայ նաեւ Ազրպէյճանի համար: Այդ պատճառով քննադատուեցայ Հայաստանի մէջ, սակայն ատիկա կարեւոր է տագնապի խաղաղ լուծման համար: Այժմ ես կը սպասեմ, որ Ազրպէյճանի նախագահ Իլհամ Ալիեւը նոյնպէս ըսէ եւ ընդունի նոյն բանաձեւը», ըսած է վարչապետ Փաշինեան:
Հայաստանի վարչապետը նշած է, որ եթէ իր ազրպէյճանցի գործընկերը ընդունի այդ բանաձեւը, բաւական մօտ կ՛ըլլայ տագնապին խաղաղ լուծումը:
«Միացեալ Նահանգներ Պիտի Ճանչնան Հայոց Ցեղասպանութիւնը»
Հայաստանի Հանրապետութեան վարչապետ Նիկոլ Փաշինեան վստահութիւն յայտնած է, որ Միացեալ Նահանգները պիտի ճանչնան Հայոց ցեղասպանութիւնը, այս մասին Փաշինեան ըսած է «Ֆոքս ԼԱ»-ի լրագրող Էլեքս Մայքլսընի հետ զրոյցին:
«Անխուսափելի է: Միացեալ Նահանգները պիտի ճանչնան Հայոց ցեղասպանութիւնը: Ես վստահ չեմ, թէ ատիկա ե՛րբ պիտի ըլլայ, բայց վստահ եմ, որ պիտի ըլլայ», ըսած է վարչապետ Փաշինեան: