ՊՈԼԻՍ, «Ակօս».- Բանակի պարտադիր ծառայութիւնը մատուցած ժամանակ ատելութեան ոճիրի մը զոհ դարձած զինուոր Սեւակ Պալըքճըի դատավարութիւնը վերաբացուած է: Դատավարութեան կրկնութեան տեղի տուող գործօնը եղաւ թիւ 668 օրէնքի լիազօր որոշումին իբրեւ հետեւանք՝ զինուորական դատարաններու փակուիլը:
Յետադարձ ակնարկով մը յայտնենք, թէ Սեւակ Պալըքճը, 24 Ապրիլ 2011-ին, պարտադիր զինուորական ծառայութեան վերջին օրերուն, մէկ այլ զինծառայող՝ Քըվանչ Աղաօղլուի հրացանէն արձակուած փամփուշտով մը սպաննուեցաւ: Զինուորական դատարանը այդ սպանութիւնը առկած համարելով եւ Աղաօղլուի բանտարկութեան շրջանն ալ նկատի ունենալով՝ ազատ արձակած էր ոճրագործը:
Հինգշաբթի, 8 Փետրուարին, Պաթմանի Քոզլուք գաւառին մէջ կայացած դատավարութեան ներկայ էին զոհուած զինուորին ծնողքը՝ Անի եւ Կարապետ Պալըքճը ամոլը, եւ իրաւապաշտպան Ճեմ Հալաւուրթ: Վերջինս պնդելով, որ ոճիրը դիտումնաւոր էր՝ պահանջած է դատավարութիւնը կայացնել եղեռնադատ ատեանի մէջ: Դատակազմը մերժած է իրաւապաշտպանին այս պահանջը եւ տուեալներու ամբողջացում պահանջելով՝ յաջորդ նիստին համար ճշդած է 7 Յունիսը: