ՍՏԵՓԱՆԱԿԵՐՏ.- Ղարաբաղեան հակամարտութեան կարգաւորման բանակցութիւններու եռակողմ ձեւաչափի վերականգնման հարցին Երեւան ու Ստեփանակերտ ունին նոյն մօտեցումը, «Ռեկնըմ» (Regnum) գործակալութեան տուած հարցազրոյցի ընթացքին այս հաստատումը կատարեց Արցախի արտաքին գործոց նախարար Մասիս Մայիլեան:
Ըստ նախարարին՝ եռակողմ բանակցութիւններու վերականգնման համար կան բոլոր անհրաժեշտ նախադրեալները:
«Ինչպէս բազմիցս յայտարարել է Հայաստանի վարչապետ Նիկոլ Փաշինեանը, Երեւանը մտադիր չէ բանակցային գործընթացում Ստեփանակերտի մասնակցութիւնը դարձնել նախապայման, միեւնոյն ժամանակ, բանակցութիւններ է վարելու միայն իր անունից: Դա նշանակում է, որ հարցերը, որոնք գտնւում են Արցախի Հանրապետութեան իշխանութիւնների բացառիկ իրաւազօրութեան եւ իրաւասութիւնների դաշտում, չեն կարող քննարկուել Երեւան-Բաքու երկկողմ ձեւաչափով: Նման մօտեցումն անաչառ է, եւ, մեր կարծիքով, կարող է ծառայել որպէս բանակցութիւնների սեղանի շուրջ Արցախը վերադարձնելու մեխանիզմներից մէկը», ըսաւ Մայիլեան:
Տարածքներու վերադարձին մասին հարցումին պատասխանելով՝ Մասիս Մայիլեան ըսաւ. «Քանի որ ադրբեջանա-ղարաբաղեան հակամարտութիւնը տարածքային վէճ չէ, հետեւաբար, անհեռանկար է խնդրի լուծման հնարաւոր ուղիներ փնտռել տարածքային զիջումների հիման վրայ։ Փաստը, որ 1988-ին, երբ սկսուեց հակամարտութեան նոր փուլը, նախկին ԼՂԻՄ շուրջ տարածքները, նոյնիսկ ինքնավար մարզի վարչական շրջաններից մէկը եղել է Բաքուի վերահսկողութեան տակ, վկայում է այն մասն, որ տուեալ հակամարտութիւնը տարածքային վէճ չէ: Այսինքն՝ չնայած նրան, որ այդ տարածքները վերահսկել է ադրբեջանական կողմը, հակամարտութիւն այդուհանդերձ եղել է: Հետեւաբար, անտրամաբանական է կարծել, որ Արցախի տարածքային զիջումների դէպքում կարելի է հասնել հակամարտութեան կարգաւորման: Անհրաժեշտ է հաշուի առնել նաեւ, որ նման առաջարկները ուղղակիօրէն առնչւում են անվտանգութեանը, որն Արցախի համար Ադրբեջանի հետ կարգաւորման գործընթացում «կարմիր գծերից» է:
Տարածքների զիջումը ուղիղ ճանապարհ է դէպի ոչ միայն Արցախի, այլեւ Հայաստանի Հանրապետութեան անվտանգութեան համակարգի ոչնչացում։ Այն վտանգի տակ կը դնի իր պատմական հողում տեղաբնիկ բնակչութեան բուն գոյութիւնը: Այլ խօսքերով ասած՝ մեզ համար այս հարցն ունի գոյութենական նշանակութիւն: Ադրբեջանի ղեկավարի յայտարարութիւններից հետեւում է, որ պաշտօնական Բաքուի ռազմավարական նպատակն է ոչ միայն Արցախի նուաճումը, այլեւ Հայաստանի Սիւնիքի մարզի եւ անգամ մայրաքաղաք Երեւանի գրաւումը: Մենք պէտք է ամենայն լրջութեամբ վերաբերուենք Ադրբեջանի նախագահի եւ գերագոյն գլխաւոր հրամանատարի յայտարարութիւններին եւ չհեշտացնենք նրա ռազմավարական նպատակի իրագործումը»: