ԵՐԵՒԱՆ, «Էրմէնիհապեր».- Թուրքիոյ խորհրդարանի քրտամէտ՝ Ժողովուրդներու ժողովրդավարական կուսակցութենէն հայ պատգամաւոր Կարօ Փայլան յայտարարեց, որ «Ակօս» թերթի հիմնադիր խմբագրապետ Հրանդ Տինքի սպանութեան ծալքերը բանալու ջանքերը կը խափանուին՝ ընդգծելով, որ ոճիրին բոլոր պատասխանատուները բացայայտելու համար անհրաժեշտ է քաղաքական կամք:
«Դժբախտաբար, 15 տարի է, որ դատապարտուած ենք ապրելու առանց Հրանդ Տինքի, որ մեզի շարունակաբար կը քարոզէր «միասին ապրիլ»», նշեց Փայլան խորհրդարանին մէջ ունեցած իր ելոյթին ընթացքին:
«Այդ օրերուն, պետութեան ներսի խաւարը որոշած էր լռեցնել Հրանդ Տինքը։ 19 Յունուար 2007ին, Հրանդ Տինք սպաննուեցաւ կազմակերպուած յանցագործութեամբ: Սպանութիւն մը, որուն մասնակից եղաւ պետութիւնը», ըսաւ պատգամաւորը եւ ընդգծեց, որ թրքական պետութիւնը ցարդ չէ առերեսուած իր ներսի խաւարին հետ:
Փայլան նաեւ անդրադարձաւ ամիսներ առաջ Թուրքիոյ ներքին գործոց նախարար Սուլէյման Սոյլուի կատարած այն յայտարարութեան, որմէ կ՛ենթադրուի, որ Հրանդ Տինքի սպանութեան հարցով դատապարտուած Էրհան Թունճել կապ ունի թուրք յայտնի քրէական հեղինակութեան՝ Սետաթ Փեքերի հետ: «Այդ օրէն անցած են 8 ամիսներ, սակայն ոչ մէկ դատախազ գործի անցած է, եւ Սուլէյման Սոյլու չէ գացած դատական մարմին՝ յայտնելու, թէ ինչ գիտէ այդ մասին: Այս իրողութիւնը դարձեալ ցոյց կու տայ, որ Տինքի սպանութիւնը խաւարի մէջ պահելու կամքը դեռ կը պահպանուի Անգարայի մութ միջանցքներուն մէջ», շեշտեց Փայլան: