Երէկ` հինգշաբթի, 18 նոյեմբերին Հայաստանի պաշտպանութեան նախարարութիւնը յայտարարեց, թէ, հակառակ ռուսական կողմին միջնորդութեամբ նախօրէին հաստատուած հրադադարին, 17 նոյեմբերի ուշ երեկոյեան ազրպէյճանական զինուած ուժերու ստորաբաժանումները անկանոն կրակ բացին Տաւուշի մարզի հայ-ազրպէյճանական սահմանի կարգ մը ուղղութիւններով. պատասխան գործողութիւններէ ետք կրակոցները դադրած են:
Ըստ նախարարութեան, 18 նոյեմբերի առաւօտեան ժամը 10:00-ի դրութեամբ իրավիճակը սահմանին յարաբերականօրէն կայուն եղած է:
Զոհերու կամ վիրաւորներու մասին տեղեկութիւններ չհաղորդուեցան:
Հայաստանի պաշտպանութեան նախարարութիւնը նաեւ յայտնեց, որ ճշդուած է ինքնութիւնը 16 նոյեմբերի մարտերուն ընթացքին զոհուած հայ զինուորին, որուն դիակը Ռուսիոյ Հարաւային ռազմական ջոկատի փոխհրամանատար, զօր. Ռուստամ Մուրատովի միջնորդութեամբ յատուկ թռիչքով Պաքուէն Երեւան տեղափոխուեցաւ: Սպան 31-ամեայ աւագ տեղակալ Տարօն Սահակեանն է:
Մարտերուն ընթացքին անհետ կորսուած 24 զինուորներու յայտնաբերման, ինչպէս նաեւ գերեվարուածներու վերադարձի աշխատանքները կը շարունակուին:
Նախարարութիւնը յայտարարութեամբ մը նաեւ հերքեց մամուլին եւ ընկերային ցանցերուն մէջ շրջան ընող այն տեղեկութիւնները, թէ 14 նոյեմբերին հայկական կողմը 6 ազրպէյճանցի զինուոր գերեվարեց, այնուհետեւ գաղտնաբար վերադարձուց զանոնք: «Բացարձակ ոչ մէկ կապ ունի իրականութեան հետ: Աւելի քան ակնյայտ է, որ նման իրադրութեան պարագային հայկական կողմը գերիներու առնուազն համարժէք փոխանակում կ՛իրականացնէր», յայտնեց նախարարութիւնը:
Իսկ 18 նոյեմբեր 2021-ի առաւօտեան Հայաստանի վարչապետը յայտարարեց, թէ Ռուսիոյ պաշտպանութեան նախարարութիւնը սահմանազատման եւ սահմանագծման նախապատրաստական փուլին վերաբերեալ առաջարկներ ներկայացուցած է: Փաշինեան մանրամասնութիւններ չտուաւ, միայն ըսաւ, որ ռուսական կողմին առաջարկը ընդունելի է Հայաստանի համար:
Ան նաեւ յանձնարարեց պաշտպանութեան նախարար Սուրէն Պապիկեանին` Ռուսիոյ պաշտպանութեան նախարարութեան հետ ճշգրտելու մանրամասնութիւնները: «Փորձենք իրագործել առաջարկները` Ռուսիոյ առաջարկներուն ծիրին մէջ եւ անոնց հիման վրայ», նշեց Փաշինեան: