«Ռուսիա կողմնակից է Քիեւի մօտ գտնուող Պուչա քաղաքին մէջ տեղի ունեցած իրադարձութիւններու միջազգային քննարկումներուն` բարձրագոյն մակարդակի վրայ», երէկ յայտարարեց Քրեմլինի բանբեր Տմիթրի Փեսքով:
«Իրողութիւններն ու փաստերու դասաւորումը ցոյց չեն տար, թէ ուքրանական պնդումները հաւաստի են», ըսաւ Փեսքով` աւելցնելով. «Կարելի չէ վստահիլ ուքրանական կողմին հրապարակած տեսերիզի նիւթին, որովհետեւ Ռուսիոյ պաշտպանութեան նախարարութեան փորձագէտները հրապարակուած տեսերիզներու խեղաթիւրման հետքեր յայտնաբերած են», ըսաւ ան:
Ռուսիոյ արտաքին գործոց նախարար Սերկէյ Լաւրով յայտարարեց, որ Պուչայի մէջ պատահածին վերաբերեալ ուքրանական պնդումները «կեղծ յարձակումներ» են, որոնց նպատակը Մոսկուան զսպելն է:
«Կեղծ լուսանկարները միայն ուքրանական կեղծ դրուագներ են դէպքերու, որոնք արեւմտեան պետութիւններու եւ Ուքրանիոյ կողմէ հրապարակուեցան ընկերային ցանցերու վրայ», ըսաւ ան:
Ռուսիոյ արտաքին գործոց նախարարութեան բանբեր Մարիա Զախարովա իր կարգին յայտնեց, որ սպաննուած քաղաքայիններու լուսանկարները Միացեալ Նահանգներու «հրամանով» առնուեցան Մոսկուան մեղադրելու սադրանքի մը ծիրին մէջ: «Որո՞նք են սադրանքին վարպետները. անշուշտ Միացեալ Նահանգներն ու ՕԹԱՆ-ը», ըսաւ Զախարովա:
Ան նշեց, որ լուսանկարներու հրապարակումէն անմիջապէս ետք հնչած արեւմտեան դատապարտումները ցոյց կու տան, որ պնդումը Ռուսիան վարկաբեկելու ծրագիրի մը մէկ մասն է:
«Այս պարագային, ինծի կը թուի, թէ այդ յայտարարութիւնները, որոնք սկսան այդ նիւթի հրապարակման առաջին վայրկեաններուն կատարուիլ, կասկած չեն ձգեր, թէ ո՛վ հրամայած է այս պատմութիւնը տարածելու», ըսաւ Զախարովա:
Գերմանիոյ վարչապետ Օլաֆ Շոլց կոչ ուղղեց քննելու եւ ամբողջութեամբ բացայայտելու Ուքրանիոյ Պուչա բնակավայրին մէջ տեղի ունեցած դէպքերը: «Խաղաղ բնակիչներու սպանութիւնը պատերազմական յանցագործութիւն է: Ես կը պահանջեմ միջազգային կազմակերպութիւններուն, մասնաւորաբար Միջազգային կարմիր խաչին արտօնել այդ շրջան այցելել», ըսաւ Շոլց:
Ան յայտնեց, որ Արեւմուտքը Մոսկուայի դէմ նոր պատժամիջոցներ պիտի հաստատէ եւ պիտի շարունակէ ուքրանական բանակին զինուորական օգնութիւն տրամադրել:
Ֆրանսայի նախագահ Էմանուէլ Մաքրոն իր կարգին յայտնեց, որ Ռուսիոյ վրայ յաւելեալ պատժամիջոցներ պէտք է հաստատուին: Ան «Ֆրանս Ինթեր» ձայնասփիւռի կայանին յայտնեց, որ «շատ յստակ փաստեր» ցոյց կու տան, թէ ռուսական ուժերը պատասխանատու են Ուքրանիոյ մէջ պատերազմական յանցագործութիւններու համար:
«Նոր պատժամիջոցներու հարցով մենք այժմ կը խորհրդակցինք մեր եւրոպացի գործընկերներուն, մասնաւորաբար Գերմանիոյ հետ», նշեց Մաքրոն: «Ես կողմնակից եմ, որ հաստատուին այնպիսի պատժամիջոցներ, որոնք մեզի պիտի արտօնեն ազդեցութիւն գործել (ռուսական) քարիւղի եւ ածուխի (ներածումներու) վրայ: Մենք գիտենք, որ ատիկա ռուսերուն համար բաւական ցաւոտ պիտի ըլլայ»:
Զելենսքի Այցելեց Պուչա
Ուքրանիոյ նախագահ Վոլոտիմիր Զելենսքի երէկ այցելեց Պուչա, ուր յայտնաբերուած էին քաղաքայիններու կոտորածներու ապացոյցներ: «Եունիըն» կը հաղորդէ, որ ան ըսած է, թէ Ռուսիան «Ուքրանիոյ մէջ ռազմական յանցագործութիւններ եւ ցեղասպանութիւն գործած է»:
Պուչա իր այցելութեան ընթացքին «Պի.Պի.Սի.»-ի թղթակիցը Զելենսքիին հարցուցած է, թէ արդեօք ան տակաւին հաւանական կը նկատէ՞ Ռուսիոյ հետ խաղաղութեան քննարկումը: «Այո՛, որովհետեւ Ուքրանիան պէտք է խաղաղութիւն գտնէ: Մենք 21-րդ դարու Եւրոպայի մէջ ենք: Մենք պիտի շարունակենք մեր դիւանագիտական եւ զինուորական ջանքերը», ըսած է Ուքրանիոյ նախագահը:
Պայտըն. «Քննադատութեան Ենթարկուեցայ,
Որովհետեւ Փութինը Ռազմական Յանցագործ Կոչեցի,
Եւ Ան Իրողապէս Ռազմական Յանցագործ Է»
Միացեալ Նահանգներու նախագահ Ճօ Պայտըն յայտնեց. «Ռուսիոյ նախագահ Վլատիմիր Փութին ռազմական յանցագործ է եւ պէտք է դատուի, եւ պէտք է յաւելեալ պատժամիջոցներ հաստատուին Ուքրանիոյ մէջ գործուող ահաւոր արարքներուն պատճառով»:
«Քննադատութեան ենթարկուեցայ, որովհետեւ Փութինը ռազմական յանցագործ կոչեցի, եւ իրողապէս ռազմական յանցագործ է», նշեց Սպիտակ տան ղեկավարը: