ՆԱՐԵԿ ԱՐՔ. ԱԼԵԷՄԷԶԵԱՆ
«Զի Աստուածն յաւիտենական յերկրի երեւեցաւ,
եւ ընդ մարդկան շրջեցաւ» (Սրբասացութիւն սուրբ պատարագի)
Հրեշտակներու եւ մարդոց համբոյրի դրոշմով
ցօղի նման երկինքէն երկիր իջաւ
մանանայի նման հոգիներու սափորները յորդեցուց
նշխարի նման բաշխուեցաւ եւ առատացաւ
Ծնաւ նոր արքան նաեւ Լիբանանի մայրիներու աւերեալ պուրակին մէջ
առանց երգի` լացով
առանց յոյսի` մութին մէջ
առանց հացի` սեւ երազով
միայն իր սիրող մօր թեւերուն եւ գուրգուրոտ հօր նայուածքին
յանձնուած`
Բեթղեհէմի մսուրին պէս
արտաքսուած
անտեսուած
լքուած
մինակ
աչքը երկինք սեւեռած
«Տէ՜ր լոյս իմ եւ կեանք իմ»
Մանուկ Յիսուս քալեց Լիբանանի մէջ ամէն տեղ եւ մտաւ ամէն տուն
ի՜նչ ճոխութիւն… չհաւատաց
ի՜նչ աղքատութիւն… չըմբռնեց
նոյն մէկ տոլարը երեսուն հազար լիբանանեան ոսկիով փոխանակող
եւ ծախսող լիբանանցինե՞րն ասոնք
«ես եկայ ասոնք բոլորը փրկելու համար», եզրակացուց
եւ երկինք վերադարձաւ… օր մը նորէն գալու վճռական խոստումով
6 յունուար 2022
Անթիլիաս – Լիբանան