ԵՐԵՒԱՆ, «Ազատութիւն».- 21 Փետրուարին կայացաւ Ռուսիոյ նախագահ Վլատիմիր Փութինի եւ Հայաստանի վարչապետ Նիկոլ Փաշինեանի հեռաձայնային զրոյցը: Երկու երկիրներուն ղեկավարները քննարկեցին ռուս-ուքրանական յարաբերութիւններուն մէջ ստեղծուած իրավիճակը եւ տարածաշրջանային անվտանգութեան հարցեր:
Քրեմլինի մամլոյ ծառայութիւնը հաղորդեց, որ կարծիքներ փոխանակուած են Արցախի շուրջ ստեղծուած իրադրութեան վերաբերեալ:
Երկու կողմերը ընդգծեցին եռակողմանի յայտարարութիւններու հետեւողական գործադրութեան կարեւորութիւնը՝ ներառեալ Հարաւային Կովկասի մէջ երթեւեկի հաղորդակցութեան եւ տնտեսական կապերու վերականգնումը, հայ-ատրպէյճանական սահմանի սահմանագծման գործընթացի շուտափոյթ մեկնարկին ուղղուած քայլերու իրականացումը:
Ռուսիոյ նախագահը Հայաստանի վարչապետը հրաւիրեց գարնան պաշտօնական այցելութիւն տալու Մոսկուա, իսկ Հայաստանի վարչապետը Փութինը հրաւիրեց Հայաստան:
Նշենք, որ 22 Փետրուարին Փութին Մոսկուայի մէջ հանդիպում մը պիտի ունենայ Ատրպէյճանի ղեկավար Ալիեւի հետ. անոնք դաշնակցային համագործակցութեան հռչակագիր մը պիտի ստորագրեն: