Ռուսիոյ նախագահ Վլատիմիր Փութին երէկ ստորագրեց Տոնպասի երկու ինքնահռչակ հանրապետութիւններուն` Տոնեցքի եւ Լուկանսքի անկախութիւնը ճանչնալու հրամանագիրները:
Փութինը եւ Տոնպասի երկու ինքնահռչակ հանրապետութիւններուն ղեկավարները կնքեցին բարեկամութեան, համագործակցութեան եւ փոխադարձ օգնութեան համաձայնագիրներ:
Փութին առաջարկեց Ռուսիոյ խորհրդարանին վաւերացնել Տոնեցքի եւ Լուկանսքի հանրապետութիւններուն անկախութիւնը ճանչնալու հրամանագիրները:
Նշեալ որոշումէն ետք Ուքրանիոյ նախագահ Վլատիմիր Զելենսքի յայտարարեց, թէ Միացեալ Նահանգներու նախագահ Ճօ Պայտընի հետ քննարկած է վերջին ժամերու զարգացումները, եւ Ուքրանիոյ Անվտանգութեան խորհուրդը ժողովի պիտի սկսի:
Միջազգային անդրադարձներու ծիրին մէջ, Միացեալ Նահանգներու Ազգային անվտանգութեան խորհուրդը գումարեց երկու նիստեր, իսկ Սպիտակ տունը յայտնեց, որ Փութինի որոշումը նախատեսած եւ պատրաստ են անմիջապէս հակադարձելու:
Միւս կողմէ, Եւրոպական Միութեան արտաքին քաղաքականութեան բարձրագոյն յանձնակատար Ճոզեփ Պորել ըսաւ, թէ Եւրոպական Միութիւնը եւ անոր դաշնակիցները միասնական, խիստ կերպով պիտի հակադարձեն Փութինի որոշումին:
Բրիտանիոյ վարչապետը Ռուսիոյ կողմէ Տոնեցքի եւ Լուկանսքի անկախութեան ճանաչումը նկատեց Ուքրանիոյ հողային ամբողջականութեան ոտնահարում: