Ուժանիւթի եւ ջուրի հարցերու նախարարի պաշտօնակատար Ուալիտ Ֆայեատ հարցազրոյցի մը ընթացքին յայտնեց, որ Սուրիոյ վրայով եգիպտական կազ ստանալու վերջնական համաձայնագիրին ստորագրութիւնը մօտալուտ է` աւելցնելով, որ ինք ծովային սահմանագծումի ամերիկացի բանագնաց Էյմըս Հոքշթայնի հետ քննարկած է Եգիպտոսէն կազ ապահովելու թղթածրարը, որուն գործադրութեան առումով բանագնացը գործակցութեան պատրաստակամութիւն յայտնած է:
«Կը նախատեսուի, որ մօտիկ ապագային Պէյրութի մէջ կայանայ հանդիպում մը, որուն պիտի մասնակցին Եգիպտոսի եւ Սուրիոյ ուժանիւթի նախարարութիւններէն ներկայացուցիչներ», յայտնեց Ֆայեատ:
Ֆայեատ նկատել տուաւ, որ Հոքշթայն հաստատած է, որ ինք պիտի օժանդակէ Լիբանանին` Միջազգային դրամատան մօտ միջամտելով, որ եգիպտական կազը Լիբանան փոխադրելու ծախսերուն ֆինանսաւորումը ստանձնէ առանց յաւելեալ նախապայմաններու:
«Հոքշթայնի համաձայն, այս գործառնութիւնը զանց պիտի կացուցէ «Սիզըր» պատժամիջոցէն, ինչպէս նաեւ ան իրաքցիներէն պիտի խնդրէ Լիբանանին նաւթ շնորհելու պայմանագիրը վերանորոգել` նկատի ունենալով, որ այդ պայմանագիրը կ՛աւարտի սեպտեմբեր ամսուան ընթացքին», նշեց ան:
Ֆայեատ հաստատեց, որ անհրաժեշտ է մօտիկ ապագային եգիպտական կազը հասցնել Լիբանան, որպէսզի կարելի ըլլայ բարելաւել երկրին ելեկտրական հոսանքի արտադրութիւնը:
Ֆայեատ կարեւոր նկատեց նաեւ, որ եգիպտական կազի փոխադրութեան համաձայնագիրը վերջնականացնելէ ետք, Յորդանանէն ելեկտրականութիւն ստանալու համաձայնագիրը գործադրուի` աւելցնելով, որ անոր ֆինանսաւորումը ապահովելու պարագային Յորդանան յանձնառու է այդ համաձայնագիրը ամէնէն արագ ժամանակամիջոցին գործադրելու, այլ խօսքով` Լիբանանին ելեկետրականութիւն շնորհելու, Սուրիոյ վրայով: