Ելեւմուտքի ու պետական ամավարկի եւ արդարութեան ու վարչական հարցերու խորհրդարանական մնայուն յանձնախումբերը երէկ գումարեցին միացեալ նիստ մը` նախագահութեամբ խորհրդարանի փոխնախագահ Էլի Ֆըրզլիի եւ ներկայութեամբ փոխվարչապետ Սաատէ Շամիի ու ելեւմուտքի նախարար Եուսեֆ Խալիլի:
Նիստին ընթացքին քննարկուեցաւ քեփիթըլ քոնթրոլի օրինագիծը:
Նիստէն ետք Ֆըրզլի յայտնեց, որ կառավարութեան ներկայացուցած քեփիթըլ քոնթրոլի օրինագիծին երկարատեւ քննարկումէն ետք, ժողովին ներկայ երեսփոխանները արձանագրեցին շարք մը դիտողութիւններ եւ մտահոգութիւններ, որոնցմէ հիմնականը քաղաքացիներուն կողմէ դրամատուներուն մէջ պահ դրուած գումարներն էին:
Ֆըրզլի շեշտեց, որ այս հարցը խորհրդարանին հիմնական մտահոգութիւնն է, որովհետեւ քաղաքացիներու իրաւունքին կառչած կը մնայ, ինչպէս նաեւ պատրաստ է քննարկելու բոլոր մանրամասնութիւնները:
«Քեփիթըլ քոնթրոլը պիտի վաւերացուի` տնտեսական համոզիչ ծրագիր մը մշակելէ ետք», ըսաւ ան:
Այս մասին խորհրդարանի նախագահ Նեպիհ Պըրրի ըսաւ. «Անհրաժեշտ է, որ Քեփիթըլ քոնթրոլի յատուկ որեւէ օրինագիծ ըլլայ նախաքայլը` պահ դրուած գումարներ ունեցող քաղաքացիներու իրաւունքներու ապահովումին»:
Ելեւմուտքի եւ պետական ամավարկի երեսփոխանական յանձնախումբի նախագահ, երեսփոխան Իպրահիմ Քանաան յայտնեց. «Քեփիթըլ քոնթրոլի օրինագիծը, որ խորհրդարանական եւ կարգի ու կանոնի սահմաններէ դուրս քննարկումի առարկայ դարձաւ խորհրդարանին մէջ, չվաւերացուեցաւ»:
Քանաան հաստատեց, որ իրենք համաձայն են քեփիթըլ քոնթրոլի օրէնքի մը, պայմանով որ անիկա հիմնուած ըլլայ յստակ թիւերու վրայ:
Արդարութեան ու վարչական հարցերու խորհրդարանական մնայուն յանձնախումբի նախագահ, երեսփոխան Ժորժ Ատուան հաստատեց, որ իրենց առաջին եւ վերջին մտահոգութիւնը քաղաքացիներուն պահ դրած գումարներուն պաշտպանութիւնն է` աւելցնելով, որ իրենք կը պահանջեն հաշուետուութեան ենթարկել այդ գումարներուն վրայ ձեռք դնողները:
Ազատագրում եւ բարգաւաճում պլոքի երեսփոխան Ալի Հասան Խալիլ յայտնեց, որ իրենք պիտի չարտօնեն, որ քեփիթըլ քոնթրոլի օրինագիծը ծածկէ բոլոր այն խախտումները, որոնք կատարուած են դրամատուներուն մէջ պահ դրուած գումարներ ունեցող քաղաքացիներուն հաշուոյն:
Խալիլ ընդգծեց նաեւ, որ քեփիթըլ քոնթրոլի օրինագիծը ունէր նաեւ այլ բացթողում մը, որովհետեւ անիկա չէր անդրադառնար 17 հոկտեմբեր 2019-էն ետք Լիբանանէն դուրս փոխանցուած գումարներուն ճակատագիրին: