Դրական շեշտադրումներ` դրական ակնկալիքներով. Ֆրանսայի հայկական կազմակերպութիւններու համակարգող խորհուրդի կազմակերպած ամէնամեայ ընթրիքի իրականացումը այսպէս բնորոշեց Ֆրանսայի հայկական կազմակերպութիւններու համակարգող խորհուրդի համանախագահ Մուրատ Փափազեան:
«Հետաքրքրական երեկոյ էր, որովհետեւ առաջին պաշտօնական մեր հանդիպումն էր Ֆրանսայի նախագահ Էմանուէլ Մաքրոնի հետ: Անոր հետ նոր կապեր հաստատելը շատ դրական է: Նախագահին առջեւ մեր խօսքը ներկայացուցինք Թուրքիոյ, Ատրպէյճանի, Արցախի հարցով, խօսեցանք ֆրանսահայ համայնքի մտահոգութիւններու մասին` Հայոց ցեղասպանութեան ժխտողականութեան հարցին հետ կապուած: Մեր բոլոր պատգամները փոխանցեցինք: Ի դէպ, շատ կարեւոր էր, որ պարզապէս ելոյթներ չհնչեցին, երկխօսութիւն եղաւ նախագահին հետ»,- «Արմէնփրէս»-ի հետ զրոյցին ըսաւ Մուրատ Փափազեան:
Ան Ֆրանսայի նախագահի ելոյթէն քանի մը կարեւոր շեշտադրում առանձնացուց, նախ այն, որ Ֆրանսայի Հանրապետութեան օրացոյցին մէջ Հայոց ցեղասպանութեան յիշատակման համար օր ամրագրուի: Ատկէ բացի, ան առանձնացուց Հայոց ցեղասպանութեան ժխտումը քրէականացնելու գործընթացին նոր ընթացք տալու դիտարկումը:
Իր խօսքին մէջ Ֆրանսայի նախագահն անդրադարձած է նաեւ Արցախի խնդրին` նշելով, որ Ֆրանսան իր աշխատանքը կ’աշխուժացնէ դիւանագիտական դաշտին մէջ:
«Ես իմ խօսքիս մէջ իրեն հրաւիրեցի Արցախ: Ֆրանսայի նախագահն ըսաւ, որ մեզի հետ կու գայ Արցախ, երբ խնդիրը լուծուած ըլլայ: Ասիկա կը նշանակէ, որ ան կը պատկերացնէ այցելութիւն` հայկական Արցախ»,-ըսաւ Մուրատ Փափազեան:
Ֆրանսայի հայկական կազմակերպութիւններու համակարգող խորհուրդի կազմակերպած ամէնամեայ ընթրիքը կայացած է յունուար 30-ին, մասնակցած է 500 անձ: Ընթրիքին մասնակցած են նաեւ Փարիզի քաղաքապետ Անն Իտալկոն, Իլ-տէ-Ֆրանս շրջանի նախագահ Վալերի Փեկրեսը, Ֆրանսայի խորհրդարանի պատգամաւորներ, ներառեալ` հայազգի պատգամաւոր Պատրիկ Տեւեճեանը, Լիոնի քաղաքապետ Ժորժ Կեպենէկեանը, Ֆրանսայի հայկական եւ հրէական համայնքներու ներկայացուցիչներ: Ընթրիքի պատուոյ հիւրն էր Թուրքիոյ խորհրդարանի պատգամաւոր Կարօ Փայլան: