ՍՏԵՓԱՆԱԿԵՐՏ, «Արմէնփրէս».- Արցախի պետական նախարար Արտակ Բեգլարեան մամլոյ առցանց ասուլիսի մը ընթացքին հաստատեց, որ Արցախի իշխանութիւնները եւ Արցախի ժողովուրդը պիտի չընդունին Ատրպէյճանի կազմին մէջ ըլլալու որեւէ տարբերակ:
«Ի հարկէ, մեր պայմանները շատ աւելի դժուար են, շատ աւելի ծանր են, քան նախապատերազմեան շրջանում, բայց դա չի նշանակում, որ մենք հնարաւորութիւններ չունենք պայքարելու: Մեր ճանապարհը աւելի երկար է մեզ թւում, բայց միւս կողմից ունենք լրացուցիչ հնարաւորութիւններ, այդ թւում` արտաքին քաղաքական հնարաւորութիւններ` մեր ինքնորոշման իրաւունքի պաշտպանութիւնը շատ աւելի ընդգծուած կերպով կազմակերպելու», նշեց Բեգլարեան:
Ըստ Արցախի պետական նախարարին` փաստերու առումով ինքնորոշման իրաւունքը ընկալելի է միջազգային հանրութեան, որովհետեւ հակամարտութեան կարգաւորման երեք հիմնական սկզբունքներէն երկուքը արդէն ժամանակավրէպ են:
«Այսինքն` տարածքային ամբողջականութեան եւ ուժի չկիրառման սկզբունքներն արդէն ժամանակավրէպ են պատերազմի հետեւանքով: Մնացել է ինքնորոշման իրաւունքի ճանաչման սկզբունքը, եւ միջազգային հանրութիւնը եւ ԵԱՀԿ Մինսկի խումբը սա շատ լաւ գիտակցում են: Դրա համար այս ուղղութեամբ մեր պայքարը շարունակում ենք: Ի հարկէ, պէտք է Հայաստանի Հանրապետութիւնն էլ գործուն ջանքեր գործադրի: Յոյս ունենք, որ առաջիկայում այս մասով որոշակի դրական առաջընթաց լինելու է», շեշտեց Բեգլարեան։
Ան նաեւ դիտել տուաւ, որ Արցախի իշխանութիւնները յաւելեալ աշխատանք կը տանին ճամբաներու անվտանգութեան մակարդակը բարձրացնելու եւ վերահսկողութիւնը զօրացնելու նպատակով: «Ադրբեջանական կողմից որոշակի լկտի վարք լինում է, այդ թւում` ճանապարհներով անցնելիս: Նշեմ, որ այս մասով Արցախի նախագահ Արայիկ Յարութիւնեանը Ազգային ժողովում յայտարարեց, որ Կարմիր Շուկայ-Շուշի ճանապարհից շուտով, մի քանի ամսուայ ընթացքում ադրբեջանական կողմը այլեւս չի օգտուելու: Այս մասով էլ լրացուցիչ աշխատանքներ տանում ենք, նաեւ աշխատանքներ են տարւում այդ ճանապարհների անվտանգութեան մակարդակը բարձրացնելու ուղղութեամբ, նաեւ գիշերային լուսաւորութեան հարցերն են լուծւում, լրացուցիչ վերահսկողութիւնն է ուժեղացւում եւ այլն» նշեց Բեգլարեան: