3 փետրուարին, Արցախի թեմի առաջնորդարանին մէջ, «Արցախ» մամլոյ ակումբին նախաձեռնութեամբ, տեղի ունեցաւ մամլոյ ասուլիս` Պաքուի ջարդերուն 30-րդ տարելիցին առիթով:
Արցախի թեմի առաջնորդ Պարգեւ արք. Մարտիրոսեան խօսեցաւ Արցախի թեմի յառաջիկայ ծրագիրներուն մասին: Ըստ անոր, Արցախի թեմի ծրագիրները մնացած են նոյնը, ինչպէս էին իրենց սկսման ատեն` 1989-ին, երբ 60 տարուան դադարէ ետք վերաբացուեցաւ Արցախի թեմը: Ըստ սրբազանին, իրենց նպատակը եղած է վերադարձնել ժողովուրդին նախնիներուն կուտակած հոգեւոր ժառանգութիւնը, վերանորոգել պատմական վանքերը եւ եկեղեցիները, հրատարակել գիրքեր` քրիստոնէական հաւատքին եւ ծէսերուն մասին:
Պարգեւ արք. Մարտիրոսեան աւելցուց, որ այդ տարիներուն վերանորոգած եւ կառուցած են 93 վանք-եկեղեցիներ: «Այսօր եւս եկեղեցաշինութեան աշխատանքները շարունակւում են: Հարիւրաւոր եկեղեցի-վանքեր կարօտ են վերանորոգման, իսկ վերանորոգման ընթացքի մէջ են Գտչավանքը, Երից Մանկանց վանքը, շարունակում են ամբողջացնել Դադիվանքի համալիրը, Գանձասարում եւ Ամարասում որոշ աշխատանքներ են տարւում», ըսաւ ան: Ըստ անոր, հրատարակուած են շուրջ 100 գիրքեր, եւ փորձ կը կատարուի աւելցնելու քահանաներուն թիւը:
«Մեր նպատակն է` վերադարձնել մեր հոգեւոր ժառանգութիւնը, բարձրացնել մեր ժողովրդի բարոյական մակարդակը, մեր ինքնութիւնը, լեզուն եւ մշակոյթը: Այս առաքելութիւնը մնացել է անփոփոխ: Դա մեր ժողովրդի հոգեւոր անվտանգութեան ապահովման առհաւատչեան է», եզրափակեց սրբազանը: