ՀՀ սփիւռքի նախարարութեան «Իմ Հայաստան» համահայկական փառատօնին ծիրէն ներս` կայացած է արժանթինահայ երգահան, «Արաքս» երգչախումբի հիմնադիր, խմբավար Ժան Ալմուխեանի 80-ամեակին եւ 55-ամեայ երաժշտական գործունէութեան մեծարման նուիրուած երեկոյ: Այս մասին կը տեղեկացնէ ՀՀ սփիւռքի նախարարութիւնը: ժան Ալմուխեան ծնած է 1932-ին Յունաստան, 1947-ին ընտանիքով հաստատուած է Արժանթին: Ուսանած է Արժանթինի ականաւոր վարպետներու մօտ:
1957-ին խումբ մը արուեստասէր ընկերներու հետ հիմնած է «Հայ երաժշտութեան բարեկամներ» ընկերակցութիւնը եւ «Արաքս» երգչախումբը, որ գեղարուեստական ղեկավարն է մինչ օրս:
Արամ Խաչատրեան համերգասրահին մէջ կայացած համերգին ժամանակ Ժան Ալմուխեանի ստեղծագործութիւնները կատարեցին մենակատարներ Սոֆիա Պաղտասարեան, Սարգիս Աղամալեան, դաշնակահարներ Արամ Թուրապեան եւ Սեդրակ Երկանեան: Շարք մը ստեղծագործութիւններ կատարեց Հայաստանի պետական ակադեմիական երգչախումբը` Յովհաննէս Չէքիճեանի խմբավարութեամբ:
Համերգին աւարտին Ժան Ալմուխեանի վաստակը գնահատած է ՀՀ սփիւռքի նախարար Հրանոյշ Յակոբեան. «Ջերմօրէն շնորհաւորում եմ Ձեր յոբելեանը` 60 գումարած 20 տարին: Դուք 60 տարի ստեղծագործել էք, հաստատուել Արգենտինայում, բայց վերջին 20 տարին նոր որակ է հաղորդել Ձեր ստեղծագործութեանը` դրանք հայրենիքի ու մայրենիի մասին են: Ձեր հոգին լցուած է ազատ ու անկախ հայրենիքի կանչով: Դուք կարողացաք պահել հայկական երգչախումբ, որը մի փոքրիկ հայկական կղզի է հեռաւոր Արգենտինայում: Շնորհակալութիւն ենք յայտնում, որ հայապահպանութեան հարցում կարողանում էք այդքան մեծ աւանդ ունենալ»:
Հրանոյշ Յակոբեան ՀՀ սփիւռքի նախարարութեան ոսկէ մետալով պարգեւատրած է Ժան Ալմուխեանը: «Ես շատ եղած եմ Հայաստան, ունեցած մենահամերգ, արժանացած ջերմ ընդունելութեան: Սակայն այսօրուան հանդիսութիւնը եւ այս բարձր շքանշանը պիտի կրեմ մեծ պատիւով եւ ոգեւորութեամբ: Ասիկա մեծ խորհուրդ ունի ինծի համար. 55 տարի առաջ մենք հիմնեցինք «Արաքս» երգչախումբը, որ նախ բանակ է, ապա գեղարուեստական խումբ»,- նշած է Ժան Ալմուխեան: