ԵՐԵՒԱՆ, «Ազատութիւն».- Ռուսական կողմին միջնորդութեամբ Հայաստան վերադարձան եւս 5 գերիներ: Փոխվարչապետ Տիգրան Աւինեանի գրասենեակէն «Ազատութեան» հետ զրոյցի մը ընթացքին յայտնեցին, որ անոնցմէ 3-ը Խծաբերդի տարածքէն գերի ինկածներն են:
Օդակայանին մէջ պարզուեցաւ, որ հայրենիք վերադարձուածներէն առնուազն մէկը գերի առնուած էր պատերազմի օրերուն` Հոկտեմբերին:
Ընդհանուր առմամբ Ատրպէյճանէն Հայաստան տեղափոխուած են 64 գերիներ:
9 նոյեմբերի եռակողմանի յայտարարութենէն ետք, Խծաբերդի մէջ գերեվարուած 62 զինուորներէն մինչեւ օրս վերադարձած են 8-ը:
Հայկական կողմին տուեալներուն համաձայն՝ Ատրպէյճանի մէջ պահուող հայ գերիներու թիւը առաւել քան 200 է, սակայն ատրպէյճանական կողմը այդ թիւը չի հաստատեր:
«Թասս»ը կը հաղորդէ, որ ռուս խաղաղապահներուն ընկերակցութեամբ Երեւանէն Պաքու փոխանցուած է մէկ գերի: Այս մասին յայտնեց Լեռնային Ղարաբաղի մէջ ռուսական խաղաղապահ առաքելութեան հրամանատար, զօր. Ռուստամ Մուրատով: