Նոյեմբեր 5-8, Երեւանի մէջ «Տեսութիւն եւ կիրառութիւն. անջրպետի յաղթահարում» խորագիրին տակ տեղի կ’ունենայ Թարգմանիչներու եւ հրատարակիչներու 6-րդ միջազգային համաժողովը: Ինչպէս կը յայտնէ «Գիրք» հիմնադրամի մամուլի ծառայութիւնը, ան կը կայանայ ՀՀ մշակոյթի նախարարութեան եւ ԱՊՀ մարդասիրական համագործակցութեան միջպետական հիմնադրամի աջակցութեամբ, որ կ’իրականացուի «Երեւանը գիրքի համաշխարհային մայրաքաղաք» ձեռնարկներու ծիրէն ներս: Այս մասին կը հաղորդէ «panarmenian.net» կայքը:
Եռօրեայ համաժողովի ընթացքին տեղի պիտի ունենայ «Հեղինակային իրաւունքի ձեռքբերում ու պաշտպանութիւն» թեմայով միջազգային սեմինար: Սեմինարին Հրատարակիչներու միջազգային ընկերակցութեան աջակցութեամբ պիտի մասնակցին երկու յայտնի փորձագէտներ` Անտյէ Սորենսըն եւ Ռիչըրտ Պալկուիլ:
Երեւանեան համաժողովի օրակարգը յագեցած է կլոր սեղաններով, թարգմանական գրականութեան ու նոր հրատարակութիւններու շնորհանդէսներով, յայտնի թարգմանիչներու ու հրատարակիչներու դասախօսութիւններով, անոնց վարպետութեան դասերով, հայ եւ հրաւիրեալ մասնակիցներու կողմէ գրական ընթերցումներով:
Համաժողովի աշխատանքային խումբերը կ’իրականացնեն երեք կլոր սեղան:
Միջազգային հաւաքի ծիրէն ներս իրականացուած շնորհանդէսներու շարքին համաժողովի մասնակիցներուն կը ներկայացուի Ալեքսանդր Պոժքոյի «Յաւերժական շարժում» գիրքը` նուիրուած Միխայիլ Քոցիւպինսքիի եւ Սերկէյ Փարաճանովի ստեղծագործական առնչութիւններուն: Գիրքին շնորհանդէսը տեղի պիտի ունենայ Փարաճանովի թանգարանին մէջ, որ կ’իրականացուի «Միխայիլ Քոցիւպինսկի եւ Սերկէյ Փարաճանով. երկու հանճարներու հանդիպումը» խորագիրին տակ:
Համաժողովի օրերուն յատուկ գրական-երաժշտական ծրագիրով հանդէս կու գան Վատիմ Մեսեացը, Թաթիանա Դանիլեանցը եւ Արեգ Միրզոյեանը: Համաժողովի տասնեակ քննարկումներու առանցքային թեմաներու շարքին անդրադարձներ պիտի ըլլան նաեւ հայ ազգային թարգմանական մշակոյթի լաւագոյն աւանդոյթներուն եւ 3-րդ հազարամեակին զանոնք ժամանակի նոր պահանջներուն համադրելու անհրաժեշտութեան մասին: