Շաբաթ, 13 ապրիլ 2013-ին երեկոյեան ժամը 8:00-ին, կազմակերպութեամբ Համազգայինի Լիբանանի Շրջանային վարչութեան, Համազգայինի «Այգ» երիտասարդական երգչախումբը «Յակոբ Տէր Մելքոնեան» թատերասրահին մէջ լիբանանահայ երիտասարդութեան նուիրեց յատուկ համերգ մը:
Սոյն համերգը նախապատրաստական համերգն էր երգչախումբին տարեկան հանրային ելոյթին, որ տեղի պիտի ունենայ կիրակի, 21 ապրիլին, երեկոյեան ժամը 7:00-ին, Պէյրութի ամերիկեան համալսարանի «Էսեմպլի Հոլ» սրահին մէջ:
Գեղարուեստական ղեկավար եւ խմբավար Զաքար Քէշիշեանի ղեկավարութեամբ եւ դաշնակահար Կամիլա Քէշիշեանի նուագակցութեամբ երիտասարդական համերգը բաղկացած էր երկու բաժիններէ, որոնց ընթացքին ներկայացուեցան եւրոպական դասական երգեր եւ հայկական ժողովրդական, հայրենասիրական, աշուղական եւ ժամանակակից խմբերգներ: Երգչախումբին միացաւ նաեւ հայկական ժողովրդային գործիքներու նուագախումբը:
Համազգայինի «Այգ» երիտասարդական երգչախումբը այսպիսով ամբողջականօրէն պատրաստ է յառաջիկայ կիրակի օր տեղի ունենալիք հանրային ելոյթին: