ԵՐԵՒԱՆ, «Արմէնփրէս».- Թուրքիոյ եւ Ատրպէյճանի հետ քննարկումներուն եւ բանակցութիւններուն ընթացքին պէտք չէ արտայայտել չհիմնաւորուած լաւատեսութիւն, որովհետեւ այդ լաւատեսութեան հիմքը չկայ, սակայն կողմերը կը դրսեւորեն փափաք՝ քննարկելու, խօսելու, փորձելու լաւատեսութեան համար հիմք ստեղծելու համար: Այս մասին յայտարարեց Հայաստանի վարչապետ Նիկոլ Փաշինեան՝ առցանց պատասխանելով լրատուամիջոցներու եւ հասարակական կազմակերպութիւններու ներկայացուցիչներու հարցումներուն:
Փաշինեան դիտել տուաւ, որ Հայաստան պատրաստ է այդ ուղղութեամբ քալելու՝ յոյս յայտնելով, թէ երկու երկիրներու յատուկ բանագնացներուն առաջին հանդիպումը չ՛ուշանար, որովհետեւ գործընթացը բաւական երկար է:
Ան շեշտեց, որ ասիկա չի նշանակեր, թէ Հայաստան համաձայն է Թուրքիոյ նախապայմաններուն՝ «Զանգեզուրի միջանցք»ին առնչութեամբ: «Հայաստանը միջանցքային տրամաբանութեան որեւէ հարց չի քննարկել, չի քննարկում եւ չի քննարկելու: Թուրքիայի հետ յարաբերութիւնների առումով, եթէ հարցը դնենք հաղորդակցութեան կապերի տրամաբանութեան մէջ, մեզ համար կարեւոր է տարանցիկ ուղիներ ստեղծելու, կառուցելու, ձեւաւորելու օրակարգը, եւ եթէ Թուրքիայի հետ յարաբերութիւններում պարզուի, որ հնարաւոր բացուող, ստեղծուող փոխադրութեան կապերը աւելի ընդարձակ տարածաշրջանային նշանակութիւն կարող են ունենալ, դա մեր օրակարգի կարեւորագոյն հարցերից մէկն է լինելու, օրինակ՝ սահմանի եւ հայ-թուրքական երկաթուղու բացումը: Խօսք է գնում օդային հաղորդակցութեան վերաբացման մասին, որը մենք դրական ենք գնահատում, ողջունում ենք եւ յոյս ունենք, որ փոխադարձ թռիչքները կը սկսուեն: Այսինքն՝ մեր ակնկալիքը յարաբերութիւնների կարգաւորումն է, բայց պէտք է հասկանանք, որ գործ ունենք բարդ խնդրի հետ, որն ունի բազմաթիւ նրբութիւններ եւ զգայունութիւններ: Հարցի վերաբերեալ Հայաստանի Հանրապետութիւնում կայ շատ զգացական վերաբերմունք», ընդգծեց վարչապետը:
Ըստ Փաշինեանի՝ Հայաստանի բոլոր իշխանութիւնները ըսած են, որ պատրաստ են Թուրքիոյ հետ յարաբերութիւններու կարգաւորման՝ առանց նախապայմաններու, ինչ որ կը նշանակէ, թէ Հայոց Ցեղասպանութեան ճանաչումը երբեք Թուրքիոյ հետ յարաբերութիւններու կարգաւորման, սահմաններու բացման նախապայման չէ եղած: Իսկ Ցեղասպանութեան միջազգային ճանաչման հարցին վերաբերեալ Հայաստանի կառավարութիւնը, ըստ վարչապետին, իր դիրքորոշումը յստակ ձեւակերպած է:
Հասարակական կազմակերպութեան ներկայացուցիչի՝ Թուրքիոյ նախագահին հետ հանդիպման կարելիութեան վերաբերեալ հարցումին պատասխանելով՝ Փաշինեան նշեց, որ Էրտողանի հետ հանդիպման գաղափար, պայմանաւորուածութիւն չկայ: «Եթէ Ռուբինեանի բանակցային գործընթացը թուրք գործընկերոջ հետ յաջող ընթանայ, եւ պրոցեսը (գործընթացը) հասունանայ մինչեւ այդ կէտը, բնականաբար պէտք է դրան յաջորդեն նաեւ բարձր եւ բարձրագոյն մակարդակով հանդիպումներ», յայտնեց Փաշինեան: