ԵՐԵՒԱՆ, «Նիուզ».- Հայաստանի մէջ տեղի ունեցած Հաւաքական անվտանգութեան պայմանագիրի կազմակերպութեան Արտաքին գործոց նախարարներու խորհուրդի (ՀԱՊԿ ԱԳՆԽ) նիստին մասնակցողները ստորագրեցին 3 փաստաթուղթեր, որոնցմէ մէկը միացեալ յայտարարութիւն է, որուն մէջ կը խօսուի միջազգային սպառնալիքներու մասին:
ՀԱՊԿի ընդհանուր քարտուղար Սթանիսլաւ Զաս, խօսելով կազմակերպութեան դիմաց ծառացած մարտահրաւէրներուն մասին՝ յայտնեց, որ երեք ուղղութեամբ ալ իրավիճակը լարուած է` նկատի ունենալով կեդրոնական Ասիոյ, կովկասեան եւ արեւմտեան ուղղութիւնները: Ան շեշտեց, որ յատկապէս լարուած կացութիւն է արեւմտեան կողմը։
Ռուսիոյ արտաքին գործոց նախարար Սերկէյ Լաւրով նիստէն ետք տուած մամլոյ ասուլիսին ընթացքին դիտել տուաւ, որ նիստին մասնակցողները որդեգրուած փաստաթուղթին մէջ հաստատեցին ապահովութեան անքակտելիութեան սկզբունքը:
«Որդեգրեցինք միջազգային ապահովական հարցերուն վերաբերեալ փաստաթուղթ, որուն մէջ առաջին անգամ ՀԱՊԿի ծիրին մէջ ամրագրուեցաւ ապահովութեան անքակտելիութեան սկզբունքը, հաւասար եւ անբաժանելի ապահովութիւն երաշխաւորելու անհրաժեշտութիւնը, երբ ոչ մէկ երկիր իր ապահովութիւնը կ՛ամրապնդէ այլ երկրի մը ապահովութեան հաշուոյն», նշեց ան։
«Ինչ կը վերաբերի (ՀԱՊԿի) քանակական կազմին, կայ քանակ, կայ որակ՝ թէ՛ պետութիւններու տեսանկիւնէն, որոնք կը մտնեն այս կամ այն ռազմաքաղաքական միութեան մէջ, եւ թէ պաշտպանական այն հնարաւորութիւններուն տեսանկիւնէն, որոնք գոյութիւն ունին», ըսաւ Լաւրով։