ԵՐԵՒԱՆ, «Փանորամա».- Մարտակերտի շրջանի Մեծ Շէն համայնքի բոլոր բնակիչները պատերազմէն ետք կը շարունակեն ապրիլ գիւղին մէջ: Այս մասին կը գրէ «Արցախփրէս»ը։
Ըստ Մեծ Շէն համայնքի ղեկավար Դաւիթ Անանեանի՝ բնակիչները սկսած են ապրիլ բնականոն կերպով: «Պատերազմից յետոյ դպրոցը վերաբացուել է 2020 թուականի Դեկտեմբերի 1-ից. այստեղ սովորում է 50 աշակերտ, իսկ մանկապարտէզը` Դեկտեմբերի 7-ից, որտեղ յաճախում է 24 երեխայ: Ունենք բուժկէտ, ակումբ, մշակոյթի տուն, հանդիսութիւնների սրահ, որոնք գտնւում են բարւոք վիճակում: Համայնքապետարանի շէնը եւս գտնւում է բնական վիճակում: Գիւղը գազաֆիկացուած է (կազով ապահովուած է), ապահովուած ելեկտրաէներգիայով: Ջրի խնդիր ունէինք. քսան օր շարունակ ջուր չէինք ստանում, բայց բոլոր խնդիրները լուծուել են», դիտել տուաւ համայնքապետը:
Ըստ աղբիւրին՝ պատերազմին պատճառով գիւղը, բարեբախտաբար, շօշափելի վնասներ չէ ունեցած։
Պատերազմական գործողութիւններէն ետք գիւղին մէջ եօթը ընտանիք վերաբնակեցուած է: Մէկ տուն վերանորոգուած է, հոն վերաբնակեցուած է Թալիշէն տեղահանուած ընտանիքը: Այս պահուան դրութեամբ, վերանորոգութեան մէջ է այլ տուն մը` Հադրութէն տեղահանուած ընտանիքին տրամադրելու նպատակով:
Խօսելով գիւղացիներուն զբաղուածութեան եւ անոնց ապագայ ծրագիրներուն մասին` Դ. Անանեան նշեց, որ բնակչութիւնը հիմնականին մէջ կը զբաղի անասնապահութեամբ, հողագործութեամբ եւ բոյսերու մշակումով։