Երէկ` երեքշաբթի, 11 յունուար 2022-ին մահացաւ հայրենի բանաստեղծ, հասարակական գործիչ Ռազմիկ Դաւոյեան:
Ան ծնած է 1940-ին, Սպիտակի շրջանի Մեծ Պարնի գիւղին մէջ: 1964-ին աւարտած է Երեւանի Խ. Աբովեանի անուան Հայկական պետական մանկավարժական ուսումնարանի պատմալեզուագրական բաժանմունքը:
1965-էն վարած է «Գրական թերթ»-ի բանաստեղծութեան եւ արձակի բաժինը: 1970-ին աշխատած է Սփիւռքահայութեան հետ մշակութային կապի կոմիտէին մէջ` իբրեւ աւագ խորհրդական:
Ռազմիկ Դաւոյեան եղած է Համազգային հայ կրթական եւ մշակութային միութեան` Հայաստանի Համազգայինի հիմնադիր մարմինի անդամ: Պարգեւատրուած է Համազգայինի շքանշանով:
1994-1996 ընտրուած է Հայաստանի գրողներու միութեան վարչութեան նախագահ:
1999-2003 եղած է Հայաստանի Հանրապետութեան նախագահի խորհրդական:
Ռազմիկ Դաւոյեանը աւելի քան 40 ժողովածուի եւ գիրքերու հեղինակ է, նաեւ` ռուսերէն, չեխերէն եւ անգլերէն լեզուներով: «Օտէոն» հրատարակչութիւնը անոր ստեղծագործութիւնները ներառած է համաշխարհային գրականութեան ժողովածուին մէջ:
Արժանացած է բազմաթիւ մրցանակներու եւ պարգեւատրումներու: