Հանրապետութեան նախագահ զօր. Միշել Աուն երէկ առաւօտեան ժամը 8:30-ին, նախագահական պալատին մէջ ընդունեց վարչապետ Նեժիպ Միքաթին, որուն հետ քննարկեց երկրին իրադարձութիւնները:
Նախագահ Աուն Միքաթիէն իմացաւ վերջերս կազմուած նախարարական յանձնախումբերու նիստերուն արդիւնքները:
Միքաթի նախագահ Աունին ներկայացուց նաեւ Միջազգային դրամական ֆոնտին հետ հաղորդակցութեան մանրամասնութիւնները, որոնց հիման վրայ պիտի կատարուին Լիբանանը տնտեսական եւ ելեւմտական իր տագնապէն դուրս բերելու բանակցութիւնները:
Միւս կողմէ, վարչապետ Միքաթի երէկ վարչապետարանին մէջ ընդունեց Եւրոպական Միութեան անդամ երկիրներու դեսպաններն ու ներկայացուցիչները, որոնց հետ քննարկեց Լիբանանի իրավիճակն ու երկրին կացութիւնը բարելաւելու նպատակով կառավարութեան մշակած ծրագիրը, ինչպէս նաեւ Լիբանանի եւ Եւրոպական Միութեան միջեւ գործակցութիւնը:
Հանդիպումէն ետք Լիբանանի մէջ Եւրոպական Միութեան դեսպան Ռալֆ Թրաֆ իրենց պատրաստակամութիւնը յայտնեց օժանդակելու եւ զօրակցելու վարչապետ Միքաթիին, կառավարութեան մշակած ծրագիրին եւ այն ամէն ինչին, որ կառավարութիւնը իր աշխատանքային ծրագիրով խոստացած է գործադրել:
Միքաթի այսօր կէսօրէ ետք ժամը 4:00-ին պիտի նախագահէ կառավարութեան ընթացիկ նիստին: