Հայ թատրոնը նոր կորուստ մը կրեց: Այսօր առաւօտեան կեանքէն հեռացաւ ՀՍՍՀ ժողովրդային արտիստ, Յակոբ Պարոնեանի անուան երաժշտական թատրոնի դերասանուհի, մեր կատակերգուներու դպրոցի վերջին նշանաւոր ներկայացուցիչ Սվետլանա Գրիգորեանը:
Սվետլանա Գրիգորեան ծնած է 30 Սեպտեմբեր 1930-ին, Երեւան: Բեմ բարձրացած է 13 տարեկանին: Ան աւարտած է Երեւանի գեղարուեստա-թատերական ինստիտուտը: 1949-ին Վարդան Աճեմեանի հրաւէրով մաս կազմած է Երեւանի Պարոնեանի անուան երաժշտական թատրոնին: Կատարած է աւելի քան 150 դեր: Եղած է հայ հեռուստաթատրոնի հիմնադիրներէն: Մօտաւորապէս 55 տարի եղած է դերասան Կարպ Խաչվանքեանի խաղընկերը: Սվետլանա Գրիգորեան ստեղծեց այնպիսի բեմատիպարներ որոնք միշտ վառ պիտի մնան հայ բեմարուեստի պատմութեան մէջ: Արժանիօրէն նուաճած էր ժպիտ պարգեւող ծիծաղի թագուհիի կոչումը: Արժանացած է ԽՍՀՄ վաստակաւոր, ՀԽՍՀ Ժողովրդական արտիստի կոչմուներուն: Արժանացած է Հայաստանի Հանրապետութեան «Մովսէս Խորենացի» եւ Հայ եկեղեցւոյ «Սուրբ Սահակ-Սուրբ Մեսրոպ» մետալներուն: 2011-ին դարձած է Երեւանի պատուաւոր քաղաքացի: Իր մատուցած ծառայութիւններուն համար պարգեւատրուած է Հայաստանի Հանրապետութեան 1-ին աստիճանի մետալով:
Սվետլանա Գրիգորեանի կեանքը հայ թատրոնին անմնացորդ նուիրումի օրինակ էր: Անոր համար թատրոնը ընտանիք էր, սէր էր եւ կեանք: