Յունուար 23-ին չէքիջեանական տարուան ծիրէն ներս Առնօ Բաբաջանեան համերգասրահին մէջ տեղի ունեցաւ հանրայայտ խմբավար, ԽՍՀՄ պետական մրցանակներու դափնեկիր, ԽՍՀՄ եւ ՀՍԽՀ ժողովրդական արուեստագէտ, 100-է աւելի մետալներով, տիպլոմներով պարգեւատրուած փրոֆէսոր Յովհաննէս Չէքիջեանի ծննդեան 85-ամեակին նուիրուած համերգ, որուն մասնակցեցաւ ՀՀ սփիւռքի նախարար Հրանոյշ Յակոբեան:
ՀՀ սփիւռքի եւ ՀՀ մշակոյթի նախարարութիւններու նախաձեռնութեամբ 2014 թուականը յայտարարուած է չէքիջեանական տարի: Նախատեսուած է մեծ երգահանին նուիրուած ձեռնարկներու ամբողջ շարք մը, որուն ծիրէն ներս կ’իրականացուին մեծարման երեկոներ, ձեռնարկներ եւ համերգներ Հայաստանի, Արցախի եւ Սփիւռքի մէջ:
ՀՀ սփիւռքի նախարարութեան հրաւէրով մայեթտրօ Չէքիջեանի մեծարման համերգ-երեկոյին մասնակցելու համար Հայաստան ժամանած է Ֆրանսայի Մարսէյլ քաղաքի Սրբոց թարգմանչաց եկեղեցւոյ կից «Սահակ-Մեսրոպ» երգչախումբը` գեղարուեստական ղեկավար եւ հանրայայտ խմբավար Խաչիկ Եըլմազեանի ղեկավարութեամբ: Երգչախումբը կատարեց Գրիգոր Փիթերջեանի «Տէր Զօր», Մակար Եկմալեանի «Տէր Կեցցոյ», հատուած Ջուզեպպէ Վերդիի «Նաբուկօ» օփերայէն եւ այլ ստեղծագործութիւններ:
Սփիւռքի նախարար Հրանոյշ Յակոբեան շնորհաւորեց մեծ արուեստագէտը, հրաշալի հայը ու անզուգական մարդը յոբելեանի առիթով, եւ մասնաւորապէս ըսաւ` «Դժուար է ասել, թէ ինչ են անում 7 միլիոն հայերը աշխարհի տարբեր հորիզոնականներում, բայց Յովհաննէս Չէքիջեանը գիտէր, թէ ինչու է գալիս հայրենիք, նա եկաւ նոր էջ բացելու հայ մշակոյթի երկնակամարում եւ մեր ազգային երաժշտութեանը տուեց համամարդկային հնչեղութիւն` Հայաստանի պետական ակադեմիական երգչախումբը դարձնելով դարի երաժշտական աշխարհի ֆենոմեն»: Ան մասնաւորապէս շեշտեց Մայեսթրոյի իմաստուն միտքը, թէ` «Առանց երգի աշխարհն աղմուկով կը լցուէր», եւ այս մօտեցմամբ Յովհաննէս Չէքիջեանը աշխարհին շարունակ ներդաշնութիւն կը պարգեւէ:
Հրանոյշ Յակոբեան շնորհակալութիւն յայտնեց նաեւ Մարսէյլի «Սահակ-Մեսրոպ» երգչախումբին եւ անոր գեղարուեստական ղեկավար Խաչիկ Եըլմազեանին, որ եկան հայրենիք եւ իրենց կատարումներով հրաշալի անականկալ մատուցեցին Մայեսթրոյին:
Ցուցադրուեցաւ վաւերագրական շարժանկար` նուիրուած Յովհաննէս Չէքիջեանի կեանքին ու ստեղծագործութեան:
«Մենք թոռներն ենք Մաշտոցի» եւ Կոմիտասի մանկական ստեղծագործութիւններու երգաշարով Մայեսթրոյին ողջունեց սուրիահայ երեխաներու մանկապատանեկան «Շառաւիղ» երգչախումբը (գեղարուեստական ղեկավար` Գայիանէ Սիմոնեան):
Ելոյթ ունեցան Հայաստանի ակադեմական երգչախումբի մենակատարներ Սոնա Մովսիսեանը եւ Պերճ Քարալեանը:
Վերջաւորութեան շնորհակալական խօսքով հանդէս եկաւ Յովհաննէս Չէքիջեանը եւ անակնկալ մատուցեց հանդիսատեսին: Ան բեմէն ղեկավարեց դահլիճը` հանդիսատեսին հետ համերգին ունկնդիր պետական ակադեմական երգչախումբի անդամները, որոնք անզուգական կատարումով ներկայացուցին Մ. Եկմալեանի «Ո՜վ Հայոց աշխարհ» երգը: Այնպէս կը թուէր, թէ ամբողջ դահլիճը կ’երգէր: